Tasiilami isumaginninnermut suliniutit seks mio. koruuninik ilaneqassapput

2021-mut missingersuutissanut isumaqatigiinniarnerni Tasiilami meeqqat inuusuttullu pillugit isumaginninnikkut suliniutit seks mio. koruuninik ilaneqarnissaannik imaqarpoq. Aningaasat anaanaq-meeqqallu illuanut inuusuttunillu sullissivimmut atorneqassapput, taakkunanngalu ikorfartuineq siunnersuinerlu suliarineqassapput.

”Taakkununnga Tasiilamilu suliniutissanut aningaasanik nassaarsinnaasimagatta uannut pingaaruteqartorujussuuvoq.  Ullumikkut meeqqat ilaqutariillu inuuniarnermikkut ajornartorsiutillit pillugit 2020-2024-mut  angusaqarusussuseqartumik politikitsinnut iliuuseqarpugut, Borgmesteri Charlotte Ludvigsen oqarpoq.

Erseqqissumik oqaatigalugu inuusuttunik sullissivimmut 3,4 mio. kr.-nik aammalu aammalu anaanaq-meeqqallu illuannut 3,15 mio. kr.-nik immikkoortitsisoqarpoq.

”Angerlarsimaffiup avataanut inissiisarnerit periarfissat kingullerpaartarissavaat, taamaattumillu anaanaq-meeqqallu illuat aqqutigalugu ilaqutariit tapersersorniarpavut, taakkuummata meeqqamut pingaarnerpaatut isumassuisuusussat" Suleqatigiissitsisut partiianni gruppimi siulittaasoq, Michael Rosing oqarpoq.


Inuusuttunik sullissivimmi ikortartuisut katersorlugit

Inuusuttunik sullissivittaarnissamut isumassarsiaq tassaavoq isumaginninnikkut suliniutit, meeqqanut inuusuttunullu tunngasut tamaasa illumi ataatsimi ataatsimoorfeqartinnissaat.

Taamaattumik najugaqarfiutigaluni katsorsartinnissamik  inuusuttunit inersimasunngornissaminnut ikorfartorneqanngikkunik suli imminut akisussaaffigilernissaminnut piareersimanngitsunut neqerooruteqalissaaq. Taakkunannga amerlanerpaat ulloq unnuarlu najugaqarfinneereersimasarput.

”Inuusuttut taakkua ilaat ulloq unnuarlu angerlarsimaffinni najugaqareersimasarput, taavalu Tasiilamut uterusuppata ikorfartorneqarnissaat pingaaruteqarpoq", Demokraatit sinnerlugit ilaasortaq Justus Hansen, Tasiilameersoq oqarpoq.

Aamma suliniutinik immikkuullarissunik allanik arlalinnik peqassaaq aammalu meeqqanut 12-nit ukiulinnut ulluunerani neqerooruteqalissalluni.