Nipilersornermik Ilinniarfik Kulusummiit pulaarneqarpoq

Oktobarip ulluisa 11-niit 14-iata tungaanut meeqqat Kulusummeersut Nuummut workshopperiaatigalutik tusarnaartitsiartorlutik tikeraarput. Nunaqarfik Kulusuk inukittunnguugaluarluni nipilersornermik ilinniarfeqarpoq, Kulusummilu Nipilersornermik Ilinniarfimmi pattannermik ilinniartitsineq qitiuvoq.

Kulusummiuaqqat nipilersortartut Nuummiinnerminni workshoppertinneqarput, tassani nipilersuutit assigiinngitsut misilerartinneqarlutillu ilinniartitsisutigineqarput. Ilinniartinneqareeramillu tusarnaartitsillutik.

Meeqqat ilinniartut Kulusummeersut ilinniartitsisortik peqatigalugu Nuummut tikeraaqqammerput.

"Meeqqat qulit nunaqarfimminni pattannermik ilinniartuupput, taamaattumik pingaartissimavarput maaniinnerminni allanik nipilersuutinik misileraatinneqarlutillu ilinniartinneqarnissaat, tamannalu iluatsilluarpoq. Kulusummi nipilersornermik ilinniarfeqarnerat iluatsitsinerujussuartut oqaatigisariaqarpoq, innutaasut ikitsunnguugaluarlutik periarfissatsialammik peqarput,” taama oqarpoq Sermersuumi Nipilersornermik Ilinniarfimmi Aqutsisoq Pipaluk Lynge Berthelsen.

Nuannisarput ilikkagaqarlutillu

Meeqqat Nuummiinnerminni misigisaqarluarsimasut ilinniartitsisuat Natalie Holm oqaluttuarpoq. Ilaatigut Nuummi Nipilersornermik Ilinniarfik nutaamik inersuartaaqqammersoq takorniariarlugu nipilersorfigaat, kommunip allaffiani takornariartinneqarlutik kiisalu Nanookikkunni erinarsortartoq Frederik Elsner naapissimallugu.

”Meeqqat misigisaqarluarlutik nuannisaqaat, uanga aamma angalanerput iluarisimaarpara,” Natalie Holm oqarpoq, nangillunilu

”Ilinniartuutikka Titken Jakobsen aamma Johannes Sigurdsenimiillu workshopertinneqarput. Aamma qarlortaammik ilinniartinneqaramik tonet (nipit) anersaartornerlu ilinniarpaat, tamanna siornatigut misilinnikuunngilaat taamaammallu misilittaagamik nuannisaqaat,” meeqqat ilinniartitsisuat Natalie Holm oqarpoq.

Meeqqat Kulusumeersut najukkaminni tusarnaartitsisarput, taamaammat tusarnaartitsineq taakkunanut takornartaanani.

“Meeqqat Kulusummi tusarnaartitsigaanamik angajoqqaavi nunaqqataalu tusarnaartuusarput, kisianni Nuummi tusarnaartitsinerat allarluinnaavoq, tassa inuit nalusaat tassani tusarnaartuugamik. Tamanna meeqqat pissangagalugulu nuannaraat, aatsaavissuarmi nalusaminnut tusarnaartitsigamik," Natalie Holm oqarpoq.

Kulusummiuaqqat KNR-TV-mi aallakaatinneqartartoq “Issittormiuaqqat”-nut aamma pulaarsimapput, taannalu ataasinngormat oktobarip 19-ianni aallakaatinneqarpoq.