Tasiilami inuusuttut illuaraliarnissamut tamanut aqqutissiuussisuupput

Tasiilami Najukkami Ataatsimiititaliap siunertaa Najukkami Ataatsimiititaliamit naammassineqarluarpoq. Illoqarfimmi sanasut inuusuttullu illuaqqamik nappaanissamut ulappussimapput - illoqarfimmi. Inuusuttut marluk suleqataanerup qanoq issimaneranik oqaasertaliipput.

Aasap ingerlanerani Tasiilami illuaraliorneq piviusunngortinneqarpoq. Najukkami Ataatsimiititaliamit innuttaasut angalanissamut periarfissaqanngitsut atorsinnaasaannik illuaraliornissaq kissaatigineqarpoq.

Taamaattumik Ataatsimiititaliaq illoqarfimmiit kilometerinik tallimanik ungasitsigisumi sumiiffimmik pitsaasumik nassaarsimavoq, taamaalilluni illoqarfik qimanneqartarpoq pinngortitamiittutullu misigaluni - naak angalaanngikkaluarluni.


Illoqarfimmi sanasoq inuusuttullu uummaarissut

Tasiilami Najukkami Ataatsimiititaliaq Inuusuttut kulturikkut illuanut, Igdlo, saaffiginnippoq, inuusuttullu tassani piumassuseqarluartut amigaataanngivipput.

Illuaraq illoqarfimmi sanasumit napparneqarpoq, suliallu taannartaa inuusuttut paasisaqarfiginerulerpaat.

”Illuaqqammi katitertakkatut suliarineqartarput, suliniullu una iluaqutigalugu qanoq suliarineqartarnerannik ilikkagaqangaatsiarpunga” 17-inik ukiulik Ingrid Ignatiussen oqarpoq.

Aasap ingerlanerani inuusuttut nerrivinnik, illernik, issiavinnillu takisuunik sanaqataasimapput, taamalu illuaqqap ilua naammassillugu.

”Peqataaffigalugu nuanneqaaq ilikkagaqarnarlunilu. Ilaatigut maskinamik pilattuummik uuttuummillu atuineq pikkoriffiginerulerpara”, 21-nik ukiulik Kristian Kunak oqarpoq.

Silataani inuusuttut illuaqqamik qalipaallutik ulappussimapput. Maanna illuaqqami aneersuartarfik kisimi amigaataalerpoq, pilersaarutillu malillugit upernaamut sananeqassaaq.


Misilittakkat pitsaasut ingerlateqqinneqarput

Najukkami Ataatsimiititaliap suleqatigiinneq assut nuannarisimavaat, taamatullu aamma inuusuttut, taakkumi aamma suliniummut piginneqataasutut aamma misigisimalerput.

”Illuaqqap piareersarnissaanut peqataanikuugatta ikinngutivut ilaquttavullu ilagalugit naammassivippat unnuiffigalugu misilikkusupparput”, Ingrid Kristianilu marluullutik oqarput.

Misilittakkat pitsaasut tunngavigalugit inuusuttut suliniutinut assingusunut peqataasarnissaat pilersaarutaavoq.

Piareersarnermit assit uani takukkit: