Atuartut angerlarsimaffeqanngitsunik akeqanngitsumik nerisitsiniartut

Sisamanngorpat FoodLab piffissami sivikitsumi najukkami imminut attanneqarsinnaasumik cafe-utinneqassaaq (pop-up-cafe), tassani Nuuk Internation Friskole-mi (NIF) atuartut Nuummi angerlarsimaffeqanngitsunut iggassillutillu nerisitsissammata.

NIF-imi atuartut sapaatip akunnerani immikkut piujuartitsineq pillugu sammisaqarput

Kommuneqarfik Sermersooq, NIF, Frelsens Hæri, Royal Greenland aamma Pisiffik suleqatigalugit angerlarsimaffeqanngitsut akeqanngitsumik ulloqeqqasiortinneqassapput, FoodLab akunnerni marlussunni najukkami piffissami sivikitsumi cafe-ngortinneqarpat imminnut attanneqarsinnaasumik ingerlatsisinnaanerup aqqani.

”Suliniut una assigiinngitsorpassuarnik pitsaasunik ilaqarpoq. Meeqqat nerisassiornermik aamma cafe-mik ingerlatsinermik ilikkagaqassapput, aamma maangaannartitsiumanani nerisassat nioqqutissanit atunngitsuukkanit pisut atortussaagatsigit. Peqatigitillugulu atueqqissinnaaneq aamma tassaniippoq, nerisassat akeqanngitsumik angerlarsimaffeqanngitsunut sassaalliunneqartussaammata”, FoodLad-imi suliniummik aqutsisoq Anne Nivíka Grødem oqarpoq.


Sapaatip akunnerani immikkut sammisaqarneq nereqatigiinnermik naggaserneqassaaq

NIF-imi atuartut sapaatip akunnerani immikkut sammisaqarnerminni piujuartitsineq aalluppaat, tassanilu nerisassanik atorluaaneq immikkut pingaarutilittut sammineqarpoq. Ataasinngornermi ullaakkulli meeqqat nerisassanik maangaannartitsinermik atuartinneqarput, pingasunngorpallu FoodLab pulaassavaat, nerisassat Royal Greenlandimit aamma Pisiffimmit tunniunneqartut takusarlugit. Nerisassallu tunniunneqartut tunngavigalugit atuartut nerisassanut najoqqutassarsiussapput, taakkulu cafeqartitsinerminni tulluarsarlugit katitissavaat.