Juullip qaammataani juullerpalaarnissamut nuannataarnissamullu periarfissaqartuaannarpoq. Tasiilami Meeqqanut Ilaqutariinnullu Sullissivimmi ilaqutariit tamarmik juullip tipaatsunnartuanik misiginissaat pingaartinneqarpoq.
Misigisassarlu taanna misigitinniarlugu Tasiilami Meeqqanut Ilaqutariinnullu Sullissivik juullisiortitsinissamik aaqqissuussivoq. Sullissivik nalinginnaasumik assigiinngitsunik neqerooruteqarfiusarpoq soorlu ammasumik siunnersuinerit, aappariinnik ilaqutariinnillu oqaloqateqarnerit, angerlarsimaffimmi ilaqutariinnut aqqutissiuussinerit, ilaqutariinnut ineriartornissamut pikkorissaanerit ilaqutariinnillu aqqutissioqatigiinneq. Meeqqanik inuusuttunillu 0-18-nik ukiulinnik immikkut ikiortarialinnik kiisalu ilaqutariinnik tapersersorneqarnikkut aqqutissiuunneqarnikkullu nukittorsarneqarnissamik pisariaqartitsisunik ikiunissaq siunertarineqarpoq.
Juullip qaammataani Meeqqanut Ilaqutariinnullu Sullissivik ilaqutariinnut sullitaminnut kiisalu Siusissukkut Iliuuseqarnermut Daqqitsiidini najugalinnut allaanerulaartumik aaqqissuussipput. Juullisiortitsinermut qaaqqusat nerisassanik kissartunik nillertunillu, risalamande, sodavand, kaffi tiimillu sassaallerfigineqarput. Meeqqat puussiaaqqamik mamartunik imalimmik tunisipputtaaq. Nuannannermi pinnguartoqarpoq, erinarsortoqarluni qiortaasoqarlunilu.
– Juullisiortitsinerni ilaqutariit akornanni nuannaarnermik misigititsinissaq kissaatigaarput juullisiortitsinermilu nuannersumi ataatsimoorfimmi meerartaminnik peqateqarnissaannut periarfissiilluarniarlugit. Nuannaarnerup utertiffigitinnerullu takutippaat iluatsilluarsimasoq. Tamanna nuannaarutigeqaarput, Isumaginninnermi Siunnersuisorti Maria Forberg, Meeqqanut Ilaqutariinnullu Sullissivimmi katsorsaanermi aqutsisoq taamak oqaluttuarpoq.
Aaqqissuussaq Tasiilami katersortarfimmi decemabrip ulluisa 17-iani 18-ianiluingerlanneqarpoq. Isumaginninnermut Aqutsisoqarfimmiillu aningaasaliiffigineqarnermikkut piviusunngorsinnaalluni.
– Isumaginninnermut Aqutsisoqarfimmit aningaasaliiffigineqarnerput peqqutaaluni juullisiortitsinermut meeqqanik inersimasunillu 100-inik qaaqqusisinnaassimavugut. Taamatut aaqqissuussineq ilaqutariinnut nuannaarutaalluartuusoq ilisimavarput taamaattumik qinnuteqaatip akuerineqarsimanera nuannaarutigeqaarput Maria Forberg nangippoq.