Nuummi najugaqalersut 25-it nutaat, Nuuk takusaqarfigaat, tusaasaqarfigalugu mamartunillu tamussertinneqarlutik

Kommuneqarfik Sermersooq Nuummi innuttanngortunik nutaanik tikilluaqqusivoq, paasissutissiinertalimmik bussinik angallassiutigaluni, mamartunik tamussiussisoqarluni nipilesortartunillu Nuummeersunik tusarnaartitsilluni.

Isertugassaanngilaq ukiut tamaasa Nuuk inuttusiartormat, innuttaasullu amerliartornerannut nuuttartorpassuit peqqutaasut ilagaat. Tamanna Kommuneqarfik Sermersuumi ilisimaarilluarneqarpoq, taamaattumillu Nuummi najugaqalersut nutaat aaqqissuulluakkamik bussimik angallanneqarput, nipilersorfigineqarlutik kalaallillu nerisassaataasa ilaannik mamartunik tamussertinneqarlutik.


Oqaatsit arlariit atorlugit illoqarfik ilisaritinneqarpoq

Aaqqissuussineq aallartippoq illoqarfik kaajallallugu bussernermik, tassanilu angallassisoq qallunaatut tuluttullu ilaatigut timersornermi periarfissat pillugit nassuiaateqarpoq, aammalu peqqinnissaqarfik qanoq ingerlanersoq oqaluttuaralugu. Kalaallisut angallassisoqarnissaq aamma neqeroorutaavoq, kisianni matumani ilaasut 25-it tamanna pisariqartinngikkallarpaat.


Nuummi Katersugaasivimmi nipilersortut tamulugassallu

Akunnerup ataatsip missaani bussimik angalaarpugut Dronning Ingridip Napparsimmavissua, umiarsualivik Nuussuarlu aqqusaareerlugit ilaasut Nuummi Katersugaasivimmut unillatsiartinneqarput, tassanilu sulisut piareersarluarsimasut tikilluaqqisusuupput.

Nipilersortartut kalaallisut sallaatsumik rapperpalaartumik nuannivissumik tusarnaartitsipput, atugaallu kingulleq kiinarpalerluni uaajeernertaqarpoq.


Nerisassat mamarluinnartut Nuummeersut

Naggasiullugu tamulugassat mikisunnguanngorlugit nerisassiarineqarsimasut sassaalliutigineqarput, kalaallit nerisassaataasa mamarluartut ilaat qallersuutigineqarput, qaleralik, kapisilik umimmallu.

Taava aamma ilaasut angallassisumut apeqquteqarsinnaatitaapput, katersugaasivimmilu takusassiarineqartut pissanganartut tulleriiaarlutik angerlannginnerminni isiginnaallattaarlugit.

Taamatut aaqqissuussisarneq ukiut tamaasa ingerlanneqartarpoq, taamaattumik ilaasimanngikkuit allamik periarfissaqarumaarputit. Taamaallaat Kommuneqarfik Sermersuup nittartagaa alaatsinaassavat, Facebook- aamma Instagramprofil.