Innuttaasunut

Sermersooq: Inissiat kommuninut tunniukkallarsigit

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

2019-imi Nuummi innuttaasut 2018-imut sanilliullugu 400-t sinnerlugit amerleriarput. Innuttaasut amerliartornerat ilutigalugu, Namminersorlutik Oqartussat inissiaataat 108-t atorneqanngillat. Tamanna pitsaanngitsoq borgmesteri isumaqarpoq.

Ineqarnermut Attaveqaqatigiinnermullu Naalakkersuisup Karl Frederik Danielsenip Justus Hansenimut akissuteqaataani atuarneqarsinnaavoq, inissiat attartortittakkat 108-t, Namminersorlutik Oqartussat sinnerlugit INI A/S-imit aqutarineqartut, atorneqanngitsut. Imaappoq, nutarterneqarneq, oquiaaneq, attartortikkuminaannerilu pissutigalugit imaluunniit ingitserneqarnissaannik imaluunniit nutarterneqarnissaannik piginnittup aalajangernissaanik utaqqineq pissutigalugu, atorneqanngitsut.

Nuummi innuttaasut amerliartortuarnerat ilutigalugu taamaalillunilu inissanik pisariaqartitsiuarneq annertusiartortillugu, inissiat attartortittakkat 108-t imaluunnit toqqavissat atorneqanngitsut Nuummi inissianik pisariaqartinneqaqisunik amerlanerusunik sanaartornermik kinguneqarsinnaagaluarput.

– Inissiat atorneqanngitsut qanoq pineqarnissaat pillugu oqallinneq sivisuallaamik ingerlanikuuvoq. Aalajangertoqarnissaanut piffissanngorpoq. Illoqarfimmi inissaaleqiffiusumi borgmesteritut Namminersorlutik Oqartussat aalajangerniaataarnerat naammagisimaarinngilluinnarpara. Maannakkut iliuuseqartoqarnissaa pisariaqartipparput, Borgmester Charlotte Ludvigsen isumaqarpoq.

Ukiuni kingullerni sisamani kommunit Namminersorlutik Oqartussallu akornanni, Namminersorlutik Oqartussat inissiaataasa kommuninut aqutassanngortinneqarnissaannik isumaqatiginninniarnerit ingerlanneqarnikuupput, suliamullu tunngaviatigut isumaqatigiittoqaraluartoq, aalajangiinissaq arlaleriarluni kinguartinneqartarpoq, tunniussinissamullu inaarutaasumik suli ulluliisoqarnikuunani. 

Namminersorlutik Oqartussat inissiaataasa kommuninut tunniunneqarnissaannut suliaq nukinginnarsimmat, inissiat atorneqanngitsut takussutissaasut Sermersuumi borgmesteri isumaqarpoq.

– Kommuneqarfik Sermersuumi inissaaleqinerup kingunerluutigisartagai annertuut naammattoortarpavut. Ilaatigut angerlarsimaffeqanngitsuuneq aammalu suliffeqarfiit illoqarfimmut sulisussaminnik pissarsiniarnissaannut periariarfissanik amigaateqarnerat. Ajornartorsiut tamanna asuliinnaanngitsorujussuartut isumaqarfigaarput. Taamaammat 2019-imi pisortat inissiaataat nutaat 350-it atulernikuupput, qularinngilluinnarparalu inissiat 108-t atorneqaratik uninngatiinnarneqarnavianngitsut, Charlotte Ludvigsen oqarpoq.

Ullumikkut Nuummiinnaq inissiaatileqatigiiffik Iserit aqqutigalugu pisortat inissiaataannut utaqqisut allattorsimaffianni inuit 2000-it sinneqartut initaarniarlutik allatseqqapput.