Kommuneqarfik Sermersuumi Sulisoqarnermut Sulisunullu pisortaq nutaaq

John Thorsen 53-inik ukiulik Kommuneqarfik Sermersuumi Sulisoqarnermut Sulisunullu Kiffartuussivimmi pisortatut marsip ulluisa aallaqqaataanni sulilissaaq. Sulisoqarnermut Sulisunullu pisortaq ilaatigut suliassaqarfiup ingerlannissaa ineriartortinneqarnissaalu Kommuneqarfik Sermersuumilu pilersaarusiornikkut aaqqissuussap ineriartortinnissaa akisussaaffigissavaa.


– John Thorsen Sulisoqarnermut Immikkoortortaqarfimmi, ilinniartitaanermi suliffiullu avatangiisaanut tunngatillugu annertuumik misilittagaqartoq maanna Sulisoqarnermut Sulisunullu pisortatut sunniuteqarluartutut sulisorilissavarput. Sulisoqarnermut Sulisunullu pisortap suleqatiginissaanut qilanaarpunga, 2.300-llu missaanni sulisoqarfiusumi oqaloqatigiiffiusumik ineriartorfiusumillu pilersitsiviunissaa naatsorsuutigalugu, Marie Fleischer, kommunaldirektørip tullersortaa ilaatigut Kommuneqarfik Sermersuumi Sulisoqarnermik Sulisunillu akisussaasoq taama oqarpoq.


John Thorseni atorfimmini nutaami suliassaminik aallartinnissaminut qilanaarpoq:
– Kommuneqarfik Sermersooq pikkorissunik ulluinnarni nukippassuarnik atuillutik sulisorpassuarnik peqarpoq, suleqatissaralu suleqatigalugu aqutsisut sulisullu kiisalu aaqqissuussap ineriartortinnissaanut suliaqarneq eqqarsaatigalugu siunersiueqatigiinnissamut ikorfartuinissamullu qilanaarpunga, John Thorsen oqarpoq.


John Thorsen politiitut ilinniarsimasoq KNR-ip Sulisoqarnermut Immikkoortortaqarfiani kingullermik atorfeqarpoq. Taanna sioqqullugu Telepostip Sulisoqarnermut Immikkoortortaqarfiani aqutsisuuvoq. Sunngiffimmi suliaqartarnermut tunngatillugu, Johni ukiorpassuarni timersornerup silarsuaani nammineq kajumissutsimik suliaqartarpoq, ilaatigullu Kalaallit Arsaattartut Kattuffianni siulittaasuusimalluni.