Januaarip 21.-anni Paamiuni, Tasiilami Ittoqqortoormiinilu Najukkami Ataatsimiititalianut qinersisoqassaaq. Najukkami Ataatsimiititaliat najukkami suliniutinik sammisassanillu aallartitsisartuupput aammalu kommunalbestyrelsip innuttaasullu akornanni oqaloqatigiinnernut ikorfartuutaasarlutik. Ittoqqortoormiini Najukkami Ataatsimiititaliami inerneqarluartunik suliaqarnerminni nuannisarsimaqaat.
Qinigaaffimmi kingullermi Ittoqqortoormiini Najukkami Ataatsimiititaliap paasititsiniaalluni ataatsimiititsinerit, arpalluni unammisitsinerit juullerpalaartitsinerillu ilaatigut suliarisimavaat.
Najukkami Ataatsimiititaliami ilaasortatut illoqarfiup ataatsimoorullugu ineriartortinnissaanut sunniuteqaqataaffiginissaa periarfissaavoq. Najukkami Ataatsimiititaliat pilersinneqarput kommunimi illoqarfinni kommunalbestyrelsip innuttaasullu akornanni ungasissuseq annikillisinniarlugu. Taamaattumik Najukkami Ataatsimiititaliami ilaasortat aamma kommunalbestyrelsimut oqartussaasunullu apeqqutinut najukkamut tunngasunut ikorfartuutaasarput. Kommuneqarfik Sermersuumi pikkorissunik Najukkami Ataatsimiititaliaqarneq illoqarfinnut nalitoorujussuuvoq.
Najukkami Ataatsimiititaliami ilaasortaalluni nuanneqaaq pissanganarlunilu. Arlallit naapittarpakka tulliani sunik aaqqissuussinissatsinnik erinisullutik utaqqillutik oqaaseqartartut. Ingerlaqqinnissatsinnut kajumissuseqalersittarpaatigut, Ittoqqortoormiini Najukkami Ataatsimiititaliami siulittaasoq Gudmund Josvassen oqarpoq.
Ukiuni kingullerni Ittoqqortoormiini Najukkami Ataatsimiititaliap paasititsiniaalluni ataatsimiinnerit ingerlattarpai, taakkunani Najukkami Ataatsimiititaliamut sunut tapiissutinik qinnutigineqarsinnaasut pillugit innuttaasunut paasititsiniaasoqartarpoq. Taamatuttaaq Najukkami Ataatsimiititaliap ukiaanerani arpannermik unammisitsillunilu decembarimi juullerpalaartitsivoq, taakkulu tapersersorluarneqaqaat. Tassani najoqqagassanik nerisassanillu sassaallertoqarpoq, kalaallillu ileqquannik juullerpalaartumik pinnguartitsisoqarpoq qititsitsisoqarlunilu.
Najukkami Ataatsimiititaliattaaq qimusserluni unamminissamut eqqumiitsuliortunullu sannavimmut tapiissuteqarpoq. Najukkami Ataatsimiititaliap tapiissutigisartagai aningaasat ikinngillat. Eqqumiitsuliortunut sannavik 50.000 koruuninik tapiiffigineqarpoq.
– Eqqumiitsuliortut sannaveqarnerat illoqarfimmut iluaqutaanissaa upperaarput, taamaattumillu tapiiffigaarput. Aasaaneranimi takornarianik tikittoqartarpoq eqqumiitsuliallu eqqumiitsuliortut suliarisinnaasaat immikkuullarissut pisiarisarlugit, Gudmund Josvassen oqaluttuarpoq.
Najukkami Ataatsimiititaliamut taasiartorit qinigassanngortillutillu.
Najukkami Ataatsimiititaliamut qinigassanngortinniaruit 16-inik ukioqalereersimassaatit illoqarfimmilu najugaqarlutit. Qinersineq pissaaq januaarip 21-anni, nal. 19 Ittoqqortoormiit katersortarfianni.
Najukkami Ataatsimiititaliamut qineqqusaarnissamut sassarnerit najukkanni kommunip allaffiani kingusinnerpaamik tallimanngorneq januaarip 17-iat nal. 14 nalunaarutigissavat.
Kommunalbestyrelsimi aamma Najukkami Ataatsimiititaliani ilaasortat pikkorissut tunniusimasullu nuannaarutigineqaqaat. Ataani takusinnaavat, sooq Najukkami Ataatsimiititaliamut qinersissanersutit pillugu Borgmester Charlotte Ludvigsen nassuiaateqartoq.
Illoqarfinni Najukkami Ataatsimiititaliamut qinersinissat pillugu eqqaasinneqarusuppit? Facebook-begivenhedenimut uunga nalunaarit Facebookilu aqqutigalugu eqqaasinneqarlutit.