Tasiilami najugaqarpit illoqarfiullu ineriartortinneqarnissaanut sunniuteqaqataarsuppit? Najukkami Ataatsimiititaliamut qinersisoqalerpoq

Januaarip 21.-iani Paamiuni, Tasiilami Ittoqqortoormiinilu Najukkami Ataatsimiititalianut qinersisoqassaaq. Najukkami Ataatsimiititaliat najukkami suliniutinik sammisassanillu aallartitsisartuupput aammalu kommunalbestyrelsip innuttaasullu akornanni oqaloqatigiinnernut ikorfartuutaasarlutik. Tasiilami tulluusimaarutigineqarpoq innuttaasut Najukkamilu Ataatsimiititaliap akornanni tatigeqatigiittoqarmat.


Tasiilami ukioq Najukkami Ataatsimiititaliamut ulapaarfiusimaqaaq. Najukkami Ataatsimiititaliaq najukkami ineriartortitsinissaq pillugu apeqqutinut amerlasuunut peqataatinneqarsimavoq. Innuttaasut suleqatigisartakkallu tatigeqatigiilernissaat qitiutinneqarsimavoq.


Najukkami Ataatsimiititaliami ilaasortatut illoqarfiup ataatsimoorullugu ineriartortinnissaanut sunniuteqaqataaffiginissaa periarfissaavoq. Najukkami Ataatsimiititaliat pilersinneqarput kommunimi illioqarfinni kommunalbestyrelsip innuttaasullu akornanni ungasissuseq annikillisinniarlugu. Taamaattumik Najukkami Ataatsimiititaliami ilaasortat aamma kommunalbestyrelsimut oqartussaasunullu apeqqutinut najukkamut tunngasunut ikorfartuutaasarput. Kommuneqarfik Sermersuumi pikkorissunik Najukkami Ataatsimiititaliaqarneq illoqarfinnut nalitoorujussuuvoq.


- Ukioq manna ulapissimaqaagut Innuttaasut, piniartut, Naalakkersuisut Kommunalbestyrelsilu oqaloqatigisarsimavagut. Soorunami taamaaliortarpugut ineriartorneq siuarsarusukkatsigu, taamaasillutik suliniutit unittuunnginniassammata, Tasiilami Najukkami Ataatsimiititaliani siulittaasoq Harald Amagtangneq nassuiaavoq.

Najukkami Ataatsimiititaliami qitiutikkusussimavagut siunertat assigiinngitsut kulturimut, timersornermut, pinngortitamut piniartunullu tunngassuteqartut. Najukkami Ataatsimiititaliap misigisarpaa, innuttaasut suliatsinnut tatiginnittuusut.


- Innuttaasunit tusartinneqartarnerput tamatigut nuannersuusarpoq. Pissuserissaartuupput, ilakkuminartut sulinitsinnillu iluarinninnerminnik oqaaseqartartut, Harald Amagtangneq oqaluttuarpoq.


Najukkami Ataatsimiititaliamut taasiartorit qinigassanngortillutillu.

Najukkami Ataatsimiititaliamut qinigassanngortinniaruit 16-inik ukioqalereersimassaatit illoqarfimmilu najugaqarlutit. Qinersineq pissaaq januaarip 21-iani, nal 19 Tasiilap katersortarfiani.


Najukkami Ataatsimiititaliamut qineqqusaarnissamut sassarnerit najukkanni kommunip allaffiani kingusinnerpaamik tallimanngorneq januaarip 17-iat nal. 14 nalunaarutigissavat.


Kommunalbestyrelsimi aamma Najukkami Ataatsimiititaliani ilaasortat pikkorissut tunniusimasullu nuannaarutigineqaqaat. Ataani takusinnaavat, sooq Najukkami Ataatsimiititaliamut qinersissanersutit pillugu  Borgmester Charlotte Ludvigsen nassuiaateqartoq.




Illoqarfinni Najukkami Ataatsimiititaliamut qinersinissat pillugu eqqaasinneqarusuppit? Facebook-begivenhedenimut uunga nalunaarit Facebookilu aqqutigalugu eqqaasinneqarlutit.