Kommunip timersortartui nersortariaqartut

Januaarip arfernanni Timersortartut ulluat Nuummi, Tasiilami Paamiuni Ittoqqortoormiinilu malunnartinneqarpoq, ulloq taanna Kommuneqarfik Sermersuumi timersortartut tamarmik assigiinngitsutigut takutitsilluarsimanerannik nersorniarneqarlutik.

Timersortartut assigiinngitsorpassuarnik timersuuteqartut Nuummi, Tasiilami, Paamiuni Ittoqqortoormiinilu ukiumoortumik katersuuterrapput. Nuummi borgmester Charlotte Ludvigsen takkuppoq, sassarfimminiillu oqalugiarnermini kommunimi tamarmi timersortartut tamaasa nersualaarluarlugit - pikkorinnersiukkaniit sunngiffimminni timigissartartunut.


Ujammit akissarsiat nersornaatisiallu tulluusimaarnaqisut taamannaannaq.

Aaqqissuussinermi diplomit 323-it timesortartunut kajumissutsiminnillu suleqataasartunut assigiinngitsunut agguaanneqarput, nuimanerillu qinikkanit assigiinngitsunit tunniunneqarput.

Tupaallaataanngitsumik Ukaleq Slettemark Ukiup Timersullammaatut toqqarneqarpoq, ukioqatimini Nunarsuaq tamakkerlugu sisoraatinik ooqattaasarluni pissartanngornermigut. Taanna videokkut inuulluaqqussuteqarpoq, Norgemi najugaqarnini pissutigalugu, tassanilu sisoraatinik ooqattaasarnermi sungiusarnissamut periarfissat pitsaanerummata.

Fortuna Hjørring-imi assammik arsartartoq Asii Kleist Berthelsen ukiumi piginnaasalittut toqqarneqarpoq, taavalu GSS-Assammik Arsartartut arnani angutinilu ukioq manna iIigiillammattut toqqarneqarlutik. Ukiumi Aqutsisuullammak tassaavoq Jens Kristian Berthelsen NS-84-imeersoq, taavalu nalunnermi sungiusaasoq Jonas Tetzschner Ukiumi Sungiusaallammattut toqqarneqarluni.

Nersornaatit tamarmik kommunimi qinikkanit tunniunneqarput, Kajumissaasiissut kisiat pinnagu, taanna Timersoqatigiit Kattuffiata Jørgen Isak Olsenimut nuannaarutigalugu tunniummagu.


Nipilersortut issiaviillu maavaartut

Nersornaasiinerit oqalugiarnerillu saniatigut nipilersortunik akunniliisoqallattaarpoq ilaatigut 3950 Band, taavalu timersortartut tusaamaneqarluartut qaqitinneqartarput nuannersunik assigiinngitsunik oqaloqatigineqalaarlutik.

Anni Damgaard, siornatigut Ukiumi Aqutsisullammattut toqqagaasimasoq, siulersuisuni sulinerminik oqaluttuarpoq, aammalu Arnannguaq Steenholdt ukiuni qulini ataannartumik assammik arsartartuulluni Kalaallit Nunaanni pissartaajuarsimalluni qanoq kaammattuijuartoqartassanersoq pillugu eqqartuivoq. Aammalu Kim Godtfredsen ukiuni 30-ini timersortartooreerluni kingumut qiviartinneqarluni apersorneqarpoq.

Ukaleq Slettemark - Ukioq manna timersullammak



Asii Kleist Berthelsen - Ukioq manna piginnaanilik



GSS-Håndbold - Ukioq manna arnani angutinilu holdeqatigiit



Jens Kristian Berthelsen - Ukioq manna aqutsisullammak



Jonas Tetzschner - Ukioq manna sungiusaasuullammak



Jørgen Isak Olsen - Kajumissaaserneqartoq