Januaarip 21.-iani Paamiuni, Tasiilami Ittoqqortoormiinilu Najukkami Ataatsimiititalianut qinersisoqassaaq. Najukkami Ataatsimiititaliat najukkami suliniutinik sammisassanillu aallartitsisartuupput aammalu kommunalbestyrelsip innuttaasullu akornanni oqaloqatigiinnernut ikorfartuutaasarlutik. Paamiuni Najukkami Ataatsimiititaliaq qinersivimmi kingullermi arlalinnik angusaqarpoq.
Tamakkiisumik pilersaarut aammalu ilaqutariit Kjeldsenikkut tikilluaqquneqarnerat Paamiuni Najukkami Ataatsimiititaliap suliniutit peqataaffigisaasa imaluunniit qinigaaffimmi kingullermi aallartissimasaasa ilagiinnarpaat.
Najukkami Ataatsimiititaliami ilaasortatut illoqarfiup ataatsimoorullugu ineriartortinnissaanut sunniuteqaqataaffiginissaa periarfissaavoq. Najukkami Ataatsimiititaliat pilersinneqarput kommunimi illioqarfinni kommunalbestyrelsip innuttaasullu akornanni ungasissuseq annikillisinniarlugu. Taamaattumik Najukkami Ataatsimiititaliami ilaasortat aamma kommunalbestyrelsimut oqartussaasunullu apeqqutinut najukkamut tunngasunut ikorfartuutaasarput. Kommuneqarfik Sermersuumi pikkorissunik Najukkami Ataatsimiititaliaqarneq illoqarfinnut nalitoorujussuuvoq.
Lucia Møller Grønvoldimut, Paamiuni Najukkami Ataatsimiititaliami siulittaasuusumut Najukkami Ataatsimiititaliap suliai pingaaruteqarlutillu nuannersuupput.
– Qularutissaanngilaq Najukkami Ataatsimiititaliami ilaasortaalluni sulineq nuannersuusoq. Ilaannikkut ajornakusuulaartaraluarpoq, kissaatit amerlasuut eqqarsaatigisussaatillugit. Tamanut pitsaanerpaamik iluaqutaasussaq ataatsimoorluta sulissutigisarparput. Innuttaasut allat suliatsinnik nuannaarutiginnikkaangata, soorunami uagut nuannaarutigisarparput, Najukkami Ataatsimiititaliami siulittaasoq Lucia Møller Grønvold nassuiaavoq.
Paamiuni Najukkami Ataatsimiititaliaq pingaarnernik pilersaarusiamik suliaqarnikuuvoq, siunissami illoqarfimmi suliniutissanik tikkuussisumik. Suliniutissat tassaasinnaapput pinnguartarfiliornissaq, illoqarfimmi qaammaqqusersuineq imaluunniit illoqarfimmi kusassaanissaq. Pilersaarut kommunalbestyrelsip Paamiut ineriartortinnissaannut takorluugaannik pingaarnernik Pilersaarut Tamakkiisoq imaqarpoq. Taanna ilaatigut Paamiuni issiavinnik illuaqqanillu sanaartortitsinermik kinguneqarnikuuvoq illoqarfimmi kusassaatigineqartunik, sulilu najugarinissaanut nuannernerulersitsisunik.
Ilaqutariit Kjeldsenikkut tikilluaqqunissaannut komité.
Nunarsuaq tamakkerlugu angalareerlutik Dorthe aamma Jens Kjeldsen angallamminnik aasaq ’19-mi Paamiunut tikipput. Ullormi tassani Najukkami Ataatsimiititaliaq tikilluaqqusilluni komitémik piareersimatitsivoq katersortarfimmi kaffillertitsilluni timersortarfimmilu kusanaqisumik nerersuartitsilluni. Aaqqissuussineq ilassilluarneqaqaaq, inuppassuarnit peqataaffigineqarluni, umiarsualivimmilu ilaqutariit Paamiunut tikilluaqquneqarlutik.
– Suliassatut aallartinniakkavut innuttaasunit ilassilluarneqassanersut pissangassutigilaartarparput. Aaqqissuussinermilu tassani Paamiormiorpassuit tapersersuilluarnerat takullugu nuannaarutigisorujussuuarput. Taamaammat Paamiormiorpassuit ilaqutariit Kjeldsenikkut apuunneranni tikilluaqqusiartorput. Aaqqissuussineq iluatsikkaangat, taava Najukkami Ataatsimiititaliami ilaasortatut tulluusimaartarpugut nuannaarlutalu, Lucia Møller Grønvold oqaluttuarpoq.
Najukkami Ataatsimiititaliamut taasiartorit qinigassanngortillutillu.
Januaarip 21.-iani 2020 Paamiuni Najukkami Ataatsimiititaliamut qinerseqqittoqassaaq. Imaappoq, illit illoqarfiup siunissami ineriartortinneqarnissaanut sunniuteqarnissannut periarfissaqarputit. Najukkami Ataatsimiititaliami siulittaasumut Lucia Møller Grønvoldimut pingaaruteqarpoq innuttaasut peqataanissaannut kajumissaaruteqarnissaq.
– Inuusuttut amerlanerusut Najukkami Ataatsimiititaliami ilaasortaanissaat kissaatiginaraluarpoq. Inuusuttut peqataanissaat amigaatigilluinnarparput, taamaattumillu sapiissuseqartunik takorusuppugut. Paamiut tassaassaaq illoqarfik kikkunnit tamanit najugaqarfigalugu nuannersoq. Taamaattumillu kikkut tamaasa tusarfigerusuppavut, Najukkami Ataatsimiititaliami siulittaasoq Lucia Møller Grønvold qungujulluni nassuiaateqarpoq.
Najukkami Ataatsimiititaliamut qinersissaguit 16-inik ukioqalereersimassaatit illoqarfimmilu najugaqarlutit. Qinersineq pissaaq januaarip 21.-iani nal. 19, Paamiut katersortarfianni.
Najukkami Ataatsimiititaliamut qineqqusaarnissamut sassarnerit najukkanni kommunip allaffiani kingusinnerpaamik tallimanngorneq januaarip 17-iat nal. 14 nalunaarutigissavat.
Kommunalbestyrelsimi aamma Najukkami Ataatsimiititaliani ilaasortat pikkorissut tunniusimasullu nuannaarutigineqaqaat. Ataani takusinnaavat, sooq Najukkami Ataatsimiititaliamut qinersissanersutit pillugu Borgmester Charlotte Ludvigsen nassuiaateqartoq.
Illoqarfinni Najukkami Ataatsimiititaliamut qinersinissat pillugu eqqaasinneqarusuppit? Facebook-begivenhedenimut uunga nalunaarit Facebookilu aqqutigalugu eqqaasinneqarlutit.