Innuttaasunut

Qeqertarsuatsiaani utoqqaat ornittagassaqalissapput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Utoqqaat siusinaartumillu utoqqalinersiallit ukiortaamiit ornittagassaqalernissartik qilanaarisinnaavaat.

Utoqqalinersialik Ane-Maria Berthelsen utoqqarmiuni najugaqartoq nutaarsiassamut nuannersumut nuannaarpoq.

”Uagutsinnut isumaqartupilussuuvoq, kiisami ornittagassaqalissaagut naapiffiusinnaasumik, sammisassaqarfiusinnaasumik nuannisaqatigiiffiusinnaasumillu. Sinerissamiittut utoqqaqatigut usoruttarsimavakka ornittagaqarmata, uagullu assinganik pisinnaalernissarput assut nuannerpoq”, Ane-Maria Berthelsen oqarpoq.

Nunaqarfimmi aqutsisut siulittaasuat Jonathan Jakobsen utoqqaat ornittagaqarnissaanut siunnersuuteqartuuvoq, taassumalu nuannaarutigaa suliniut piviusunngortinneqalermat.

”Utoqqaat naapiffeqartarnissartik pisariaqartippaat. Amerlasuut angerlarsimaffimminniik anineq ajorpulluuniit kiserliortarlutillu, taamaammat ornittagaqalernissaat utoqqarnut pingaaruteqassaqaaq”, Jonathan Jakobsen oqarpoq.

 Qeqertarsuatsiaanni utoqqaat siusinaartumillu utoqqalinersiallit 32-it missaanniipput. Ornittagassaat suliarineqarluni aallartereerpoq. Illu atorneqartussaq nunaqarfiup qeqqaniippoq, illulu atorneqartussaq qaleriippoq ataani utoqqarnik atorneqarumaarpoq, qulaaniittorlu mersortarfissamik Amitsialak-mik atorneqarumaarluni.