Utoqqaat pillugit Siunnersuisooqatigiit innuttaasunik ataatsimiisitsipput

Nuummi katersortarfimmi innuttaasunik ataatsimiisitsineq peqataaffigineqarluartoq, Kommuneqarfik Sermersuumi innuttaasut Utoqqaat pillugit Siunnersuisooqatigiit naapippaat, suliaallu paasisaqarfigalugit

Utoqqaat pillugit Siunnersuisooqatigiit Kommuneqarfik Sermersuumi utoqqaat sinnerlugit suliaqartuupput, suliaminnillu siunnertaasa ilagaat, utoqqaat tamarmik kommunip iluani najugaqartut, Ittoqqortoormiiniikkaluarpata, Tasiilamiikkaluarpata, Paamiuniikkaluarpataluunniit imaluunniit Nuummiikkaluarpata nunaqarfinniluunniit ikkaluarpata tusaaneqartarnissaat.

Innuttaasunik ataatsimiisitsinermi septembarip 19-iani 2019 ingerlanneqartumi innuttaasut soqutiginnittut utoqqaat pillugit siunnersuisooqatigiinni ilaasortat naapinnissaanut periarfissiivoq, suliaallu anguniagaallu paasisaqarfigineqarsinnaallutik. Apeqqutit akineqartut ilagaat, suut eqqarsaatersuutit anguniakkallu inissisimanersut utoqqaat pillugit siunnersuisooqatigivisa pilersinneqarneranni. Kommuneqarfik Sermersuullu iluani utoqqarnut politikkip killiffia sumut killinnersoq taavalu 2017-2021-imut anguniakkat qanoq ingerlanersut saqqummiunneqarluni.

Innuttaasunik ataatsimiititsineq Nuummi ingerlanneqaraluartoq - Kommuneqarfik Sermersuumi utoqqarnik tamanik aamma Nuup avataani najugaqartunik sullissinissaq Utoqqaat pillugit Siunnersuisooqatigiinnit qitiutinneqarpoq

Ataatsimiigiartut paasisaqarluarusuttut apeqquteqarnissaminnullu tunuarsimaanngitsut 120-it missaanniittut peqataapput, paaserusutatik paasisaqarfigaat, Isumaginninnermut Sulifffeqarnermullu ataatsimiititami siulittaasup tullia Lone Rosengreen Pedersen apeqquteqarfigineqarsinnaasut ilagivaat, Utoqqaat Pillugit Siunnersuisooqatigiiffiani ilaasortat tamarmik aammalu siulittaasuat Laannguaq Lynge.