Danmarkimi parnaarussaaqqanikut erinarsoqatigiit ulluni makkunani Nuummiipput ilaatigullu parnaarussivimmi nutaami isersimasut peqatigalugit erinarsoqattaarput. Angalaqatigiit assiliisuat Jørgen Diswalip angalanera Kommuneqarfik Sermersuumi kulturimut aningaasaateqarfimminngaanniit taperneqarpoq.
Erinarsoqatigiit namminneq taalliaminnik erinniaminnillu appisimaaqattaarput, taallat pisuussutinut, uppernermut, kukkusarnermut, isumakkeerinninnermut, uumissuinermut, neriunnermut peqqissiminermullu tunngassuteqarput.
Malik Mathiassen ukiuni pingasuni qaammatinilu qulini ujajaasimanini pillugu parnaarussaaqqanikuuvoq.
”Erinarsoqatigiinni peqataasarnera nuannareqaara. Tamatta parnaarussaaqqanikuuvugut immitsinnullu paasilluartaqaagut. Ataqatigiilluarpugut tapersersoqatigiilluartarlutalu”.
Malik Mathiassen maannakkut ajunngitsumik inuuneqarpoq. Nuummi parnaarussivimmut pulaarnerminni Malik erinnamik ataatsimik atuivoq. Parnaarussaaqqasarneq inuiaqatigiinnullu uteqqinneq pillugu taalliorsimavoq.
”Parnaarussaaqqanerma nalaani inuppassuit naapippakka. Arlallit parnaarussivimmut utikaajaartut. Iperagaagaanni inuiaqatigiinnut uteqqinniarneq ajornakusoorsinnaasarpoq, inuiaqatigiit akornanni tikilluaqquneqanngikkaanni, taalliaralu tassunga tunngassuteqarpoq”.
Parnaarussaaqqanikut erinarsoqatigiit Katuami Hans Egedellu oqaluffiani tusarnaartitsipput tallimanngorpallu parnaarussivittaap oqaluffia atoqqaarfissiorneqalerpat peqataassapput.