Uju partiip siulittaasuanut: Oqaloqatigiittarniaritsi

Sermersuumi kitaani Demokraatit siulittaasuata oqaaseqaataa Kommuneqarfik Sermersuumi Meeqqanut Ilaqutariinnullu Ataatsimiititami siulittaasuanut Uju Petersenimut annertuumik uissuummisitsivoq. Anna Wangenheimip Kommuneqarfik Sermersuumi meeqqanut angerlarsimaffiup avataanut inissinneqarsimasunut aningaasaleeqqittoqarnera pillugu mamiatsassutigaa.

”Imminut aperisariaqarpunga Anna Wangenheim parteeqatinilu ilumut oqaloqatigiittarnersut. Demokraatimmi aningaasaliissutigineqartoq Aningaasaqarnermut Inuussutissarsiornermullu Ataatsimiititami Kommunalbestyrelsimiluunniit akuersissutigineqarmat oqaaseqaateqanngillat, taamaattumik eqqumiiginanngitsuunngilaq meeqqanut atugarliortunut aningaasaliissuteqarneq pillugu partiimi ilaasortaq qinikkanut ilaanngitsoq pasilliisoq takullugu”, Uju Petersen oqarpoq.

Sumiiffimmi siulittaasup aamma innersuussutigaa, Sermitsiaq.ag-mi oqaatigineqartoq ulloq unnuarlu angerlarsimaffiit namminersortut nuusuttut taakkunannga anisussanngoraangata suleqatigiinnikkut ajornartorsiutit kommunip iluani suleqatigiinniarnikkut ajornartorsiortoqarneranik patsiseqartoq, taamaattumillu sipaarutissatut naatsorsuutigisaagaluit piviusunngunngitsoortut. Oqaaseqaat aamma taanna Uju Petersenip uissuummissutigaa.

”Meeqqanut inuusuttunullu tunngasunik ingerlatsisartut assigiinngitsut amerlasuujusut isumaqatigaara aamma tamakkuninnga paasisimasaqanngikkaanni malinnaaffigiuminaassinnaavoq, eqqumiiginnartorli tassa isumaqartoqassappat kommune ulloq unnuarlu paaqqinnittarfinnut namminersortunut aqutsisinnaatitaasoq”, Uju Petersen oqarpoq.

Uju Petersen isumaqarpoq, Demokraatit sumiiffimmi siulittaasuat avammut oqaaseqannginnermini paasissutissanik parteeqatimunut paasiniaaqqaarsimaguni pitsaassagaluartoq.

”Partiit allat politikkikkut qanoq suleriuseqarnissaannut akuliunnianngilanga, pitsaasuussasoraarali Anna Wangenheim paasisimasaqanngissutsi pillugu avammut nittarsaatinnginnerani demokraatinut ilaasortanut marluusunut akissutissamik ujartuissappat, taakkumi kommunalbestyrelsimi pimoorussillutik sulipput”, Uju Petersen oqarpoq.