Laura Taunâjiup kommunalbestyrelsimi sulinini nuannaraa, Tunumili kitaanilu illoqarfiit kulturikkut assigiinngissutit aporfigisarlugit.
Kommunit ukiut qulit matuma siorna kattussuunneqarmata eqqaamvaa. Taamani Nuummi ilinniartitsisunngorniartuuvoq, kommunerujussuanngortumilu aaqqissuusseqqinnerit suunersut malinnaavigisimavai.
”Suut tamarmik nutaajugaangamik aallaqqaammut tukattarnerat nalinginnaasuuvoq, tamannalumi malunnarsimavoq,” Laura Taunâjik oqaluttuarpoq.
Kommunerujussuarmi arlalinnik pitsaasumik siuariartoqarsimanera qularutiginngilaa, allarpassuilli suli pitsaanermik suliarineqartariaqarsoralugit. Kommunalbestyrelsimut ilaasortaanini nuannaraa, tassani aalajangeeqataasarami.
”Pissutsit suliarerusuppakka,” Laura Taunâjik oqaluttuarpoq.
Illoqarfiit minnerit aamma ilanngunneqartarmata namminnerlu aalajangeeqataasinnaanerat nuannaraa.
”Najukkami Ataatsimiititaliat sulilluarsimaqaat, qujanarporlu Najukkami Ataatsimiititaliat pilersissimagatsigit. Tamanna qujamasuutigeqaara,” Laura oqaluttuarpoq. Nunaqarfiit aamma ilaatinneqarnerulerneri qujamasuutigaa, siornarnit akuutinneqarnerullutik.
Illoqarfimmilli minnermeersuulluni kommunerujussuarmut ilaaneq oqittuinnaasanngilaq.
”Tunumi Nuummilu kulturit assigiinngitsupilussuupput, taamaammat kommunerput marlunnut avittuuppat Tunumi uatsinnut iluarnerussagaluarpoq, soorlu Qaasuitsup Kommunia taamaaliortoq takunikuugipput”, Laura Taunâjik oqaluttuarpoq. Tamaalli isigalugu isumalluarpoq naatsorsuutigalugu ajornartorsiutit amerlanerit ukiuni aggersuni amerlasuuni aaqqinneqarumaartut.