North Viking peqatigalugu eqqakkanik aalleqqaarneq iluatsilluarpoq

Sapaatip-akunnerani uani ESANI A/S sinnerlugu eqqagassanik immaqa aallertalersussaq North Viking, RAL-ip containereqarfiata talittarfianut tulappoq Tunumit eqqakkat ikuallatassat 905-it tonsit useralugit. Tasiilamut Tasiilamiillu angalaneq ingerlalluarsimavoq, aammalu ESANI A/S-imi aalleqqaarneq iluatsilluartutut oqaatigineqarpoq.

Umiarsuaq saviminernik usisoq

Tasiilamiit eqqakkat usingiarneqareermata North Viking maanna Grenåmut Danmarkimiittumut oqimaatsunik usilluni aallareerpoq savimerngit sisallu 1.106 tons usigigamigit, taakkulu Stena Recykling-imi atoqqitassanngorlugit suliarineqassapput.

Frank Rasmussen, ESANI a/s-imi direktøri, ikiuussimasunut tamanut qujavoq: ”Umiarsuarmik usingiaanermi usilersuinermilu RAL containereqarfiup talittarfia atorsinnaasimagatsigu aammalu entreprenørit Larsen og Co, Byens Entreprenør Arctic transport aamma Godthåb Transportservice tamarmik usingiaanermi usilersuinermilu suleqataasimasut nersualaarluarusuppavut.”

Umiarsuaq North Viking Danmarkimut angalareeruni pilersaarutit malillugit Tunumut Avannaanullu eqqakkanik saviminernillu atoqqitassanngortitassanik aalleqqissaaq.

Eqqakkanik uninngatitsigallartarfik

Eqqakkat maannakkut siunissamilu Nunarput tamakkerlugu illoqarfiit nunaqarfiillu sinnerini katersorneqartalertussat pilersaarutit naapertorlugit Nuummi eqqakkanut inissiigallartarfimmut inaalinneqartalissapput ikuallaavimmilu pioreersumi, nutaap atuutilernissaata tungaanut, ikuallanneqartassallutik.

Aamma Sisimiuni eqqakkanut inissiigallartarfiliortoqassaaq, taavalu Nuummi Sisimiunilu eqqakkanut inissiigallartarfiit 2019-imi ukiap ingerlanerani 2020-milu upernaap ingerlanerani piareernissaat naatsorsuutigineqarpoq. Sisimiuni eqqakkat poortukkat eqqakkanut inissiigallartarfimmut inaalinneqartassapput, ikuallaasarfissami nutaami ikuallanneqarnissamik tungaannut.

Annertunerusumik atuaruk, uani: esani.gl