Ukioq manna Aalborg-ip ulloqartinneqarnerani aaqqissuussinermi kingullermi inuit 500-t sinneqartut peqataapput, ulloq taanna ataatsimut tusarnaartitseqatigiinneq ingerlanneqarpoq, Aalborg Symfoniorkester-it aamma Nuummi nipilersortartut erinarsortartullu, soorlu Nina Kreutzmann Jørgensen, Josef Lund Josefsen aamma Arnannguaq Gerstrøm peqatigalugit.
”Aaqqissuussaq pissarsiaqarfioqisoq alutornarluinnartumik naammassineqarpoq. Sapaatip akunnerata ingerlanerani qulequttanik assigiinngitsunik, massakkullu suleqatigiinnissamik isumaqatigiissummut ilanngunneqartunik, eqqartugaqarpugut”, borgmesteriugallartoq Uju Petersen oqarpoq.
Eqqartorneqartunut teknologi mingutsitsinngitsoq, illoqarfimmik pilersaarusiorneq aamma sulisussarsiortarneq pillugit misileraaffimmik ataatsimoorussamik suleqatigiissuteqarnissaq ilaavoq.
”Aalborg-imik suleqarteqarnerput immikkuullarissuuvoq. Siusinnerusukut Aalborg Kommune isumaginninnerup iluani aammalu illoqarfimmik inerisaaneq pillugu siunnersuinermik allanillu susassaqarfiusunik pilersiortorneqartut pillugit sulisuminik attartortitsisarsimavoq, tamannalu tamatta iluaqutigisimavarput”, Uju Petersen oqarpoq
Nuummi Aalborg-ip ulloqartinnerani ukiut sisamakkuutaarlugit ingerlanneqartarpoq, tullianilu 2023-mi ingerlanneqassaaq. Ukiut marluk qaangiutiinnarpata, illoqarfittut ikinngutigiit taakkua marluk 2021-mi Aalborg-imi kalaallit ulloqartinneqalerpata naapeqqissapput.