Rolf; Kommunerujussuaq nuannaraara

Kommuneqarfik Sermersooq ukiunik 10-nngortorsiorpoq. Ukiut 10-t matuma siornatigut kommunit kattussuutsinneqarput, ukiullu taakkua ingerlanerini kommuni Sermersooq ineriartupiloorsimavoq. Alliartorneq, ineriartorneq, pisariillisaanerit periarfissallu nutaat ukiut ingerlanerini pilersinneqarsimapput siunissami kommunip tunngavissai.

Suna killiffiua? Ukiut kingulliit 10-t qanoq ingerlasimappat? Suut ingerlalluarpat aamma suut ingerlalluannginneruppat? Kommunimi politikerit isumaat pillugit aperivagut.

Ulluni tulliuttuni nittartakkatsinni kommunit kattussuutsinneqarnerat pillugu politikerit isumaat atuarneqarsinnaapput.

Rolf Pikep kommunerujussuanngortitsinerit annerusumik iluarisarpai, kikkulli tamarmik isumaanut isumaqataasanngitsut nalunagu.

Rolf Pike Kommuneqarfik Sermersooq 2009-mi pilersinneqarmat Qaqortumi najugaqarpoq. Ukiup tulliani Kommuneqarfik Sermersuumut pivoq. Ullumikkullu suli Ittoqqortoormiiniilluni. Taamanili kommunit kattussuunneqarneri pitsaasutut eqqarsaatigisarsimavai. Illoqarfinnut minnernut tamanna iluaqutaasussatut isumaqarfigisimavaa.

”Taamanikkut illoqarfiit minnerit nunaqarfiillu kommunini ataasiakkaaniittut suliassaminnik kivitsinissaminnut ajornartorsiortut ikiorneqarsinnaassasut isumaqarfigisimavakka. Kommunerujussuartummi suleqatigiittoqarsinnaavoq illoqarfiillu minnerit oqinnerusumik ingerlatilersinnaallugit,” Rolf Pike oqaluttuarpoq.

Ukiuni qulini kingullerni qaangiuttuni isumaa allanngorsimanngilaq. Kommunalbestyrelsimut 2017-imi ilaasortanngorpoq, ataatsimiinnernullu arlalinnut ilaasareersimalluni, taamaaliorlunilu allanngueqataasarsimalluni. Tamannalu tulluusimaarutigivaa.

”Imaassinnaavoq arlaata isumaqatiginngikkaanga, taamaattorli kissaatigaara kommunerujussuuginnassalluta,” Rolf Pike oqarpoq.

”Sulinerup nuannaarutiginissaanut sorpassuarnik tunngavissaqarpoq, naak tamatigut oqittuinnaasanngikkaluartoq”, Rolf Pike oqarpoq.