Kommuneqarfik Sermersooq ukiunik 10-nngortorsiorpoq. Ukiut 10-t matuma siornatigut kommunit kattussuutsinneqarput, ukiullu taakkua ingerlanerini kommuni Sermersooq ineriartupiloorsimavoq. Alliartorneq, ineriartorneq, pisariillisaanerit periarfissallu nutaat ukiut ingerlanerini pilersinneqarsimapput siunissami kommunip tunngavissai.
Suna killiffiua? Ukiut kingulliit 10-t qanoq ingerlasimappat? Suut ingerlalluarpat aamma suut ingerlalluannginneruppat? Kommunimi politikerit isumaat pillugit aperivagut.
Ulluni tulliuttuni nittartakkatsinni kommunit kattussuutsinneqarnerat pillugu politikerit isumaat atuarneqarsinnaapput.
Borgmester Charlotte Ludvigsen isumaqarpoq nunatsinni kommunit kattunneqarneri kinguneqarluarlutillu iluatsilluarsimasut.
”Pitsanngorsaavigisassanik soorunami takkussortoqartuaannarpoq, ataatsimulli isigalugu kommunit kattunneqarneri iluatsilluarput”, borgmesteri taama oqarluni isummerpoq.
Inuiaqatigiit ukiut qulit matuma siorna oqallinnerisa ingerlarngi eqqaamalluarpai.
”Kommunit kattunneqartussanngornerannik oqallinneq malinnaavigaara, taamanikkullu siunissarput pissanngatigaara. Nunatsinni kommunit sisamanngornerannik kinguneqartumik kommunit 18-it kattunneqarput, kommunillu maanna tallimaapput. Inuiaqatigiinnut 56.000-sunut tamanna pissusissamisoorpoq.
Taamanikkut neriulluarniartartuuvunga, sulilu taamaattuullunga. Isumaqarpunga eqqortumik aalajangiisimalluta. Unammillernartunik nalaataqartuaannarumaarpugut, siuariartornerpulli ajunngitsumik ingerlavoq. Kommunerput suliatigut ingerlatsinikkut pikkorinnerulernikuuvoq, nunatsinnilu tamarmi sullissinerput annertunerulernisimalluni”.
”Kommunerput allanit assigineqarani – kitaaniit kangianut – assigiinngisitaarnikkut, kulturikkullu inuiaqatigiiussutsikkullu angisuujullunilu pisuujuvoq, tamannalu patajaatsumik inissisimanitsinnut tunngaviulluinnarpoq”.
”Kommunerput ukiuni qulini kingullerni ineriartupiloorpoq, aningaasaqarnikkullu siuariaateqarnera pissutigalugu inunnik ineriartortitsinernut aningaasaliissuteqartalerpugut. Kommunitsinni inuuniarneq oqilivoq, paaqqinniffinnillu sanaartortitsinikkut Paamiuni nutaamik utoqqaat illussaannik sanasimavugut, Tasiilami meeqqeriviliortitsivugut taamatuttaaq Ittoqqortoormiini utoqqarnut najugaqatigiiffiliortitsilluta”.
Charlotte Ludvigsenip siusinnerusukkut borgmesteriusoq Asii Chemnitz Narup tunuarmat 2019-imi juunip qaammataani paarlappaa.
”Atuuffik annertoorujussuarmik akisussaaffeqarfiusoq atuuffigiumavara, nuannaraaralu aamma kommunalbestyrelsimi ilaasortat sinneri suleqatigilluarpakka. Nunatsinni kommunit kattunneqarneranniit ukiut qulit qaangiupput siunissarpullu pissanganarpoq. Kommuneqarfik Sermersuup illoqarfiini nunaqarfiinilu periarfissat pitsaalluinnartuunissaannut suleqatigiinnissarput pingaaruteqarpoq”.