Kajumissutsimik suliaqarnissinnut atatillugu tapiiffigineqarnissamut qinnuteqaritsi

Kommuneqarfik Sermersuumi kattuffiit, peqatigiiffiit inuillu ataasiakkaat kajumissutsimik isumaginninnermillu suliaqarnerminnut atatillugu tapiiffigineqarnissaminnut qinnuteqarsinnaapput.

Kommune akissarsiaaqatiginagu kajumissutsiminnik suliaqarnermikkut suliniuteqartartut sulinerisa ingerlarngisa pitsaanerulernissaannut tapiissuteqarnissamut aningaasaliissutissanik immikkoortitaqarpoq. Kajumissutsimik suliaqarnikkut suliniuteqartartut tapiiffigineqarnissamut qinnuteqartut inunnik napparsimasunik, timimikkut piginnaanikitsunik imaluunniit atukkatigut inuuniarnikkulluunniit ikiortarialinnik sullitaqartuunissaat piumasaqaataavoq.

Qinnuteqarnermut piffissaliussap tullia tassaavoq: 1. oktobari 2019.

Peqatigiiffinnut qinnuteqartunut piumasaqaatit immikkut ittut: Peqatigiiffiit ilaasortanut allattorsimaffiliussapput, missingersuusiussapput naatsorsuusiussallutillu.

Ukununnga tapiissuteqartoqarsinnaanngilaq: Sammisaqartitsinernut pereersunut, inuit ataasiakkaat aaqqissuussaannut taamatuttaaq sammisaqartitsinnissanut imigassamik sassaalliiffiusussanut. Taamatuttaaq politikkimut sunniiniarnermullu tunngasutigut sammisaqartitsinissamut ingerlatsinermiluunniit aningaasartuutitigut tapiiffigineqarnissamut qinnuteqartut tapiiffigineqarsinnaanngillat.

Tamatumani piumasaqaatit qinnuteqarnermullu immersugassaq kommunip nittartagaaniipput (link).

Qinnuteqarnermut immersugassaq immersoriarlugu Kommuneqarfik Sermersuup Isumaginninnermut Suliffeqarnermullu Ingerlatsivianut allakkatigut e-mailikkulluunniit nassiunneqassaaq: Imaneq 34, 3900 Nuuk, SI@sermersooq.gl