Innuttaasunut

Ulloq naallugu atuarfimmi atuartut piginnaasatigut uppernarsaatinik tunineqarput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Ulloq naallugu atuarfimmi atuartunut sisamanut piginnaasatigut uppernarsaatit ataasinngormat tunniunneqarput, taamaalillutik pisinnaasaminnut tunngasut pisortatiguunngitsumik pappiaraatigilerlugit.

Ulloq naallugu atuarfimmi ulloq persuarsiorfiuvoq, atuartut anginerit Kalaallit Nunaanni siullersaallutik atuarfeqarnerup ataani Open Collage Networkimiit piginnaasatigut uppernarsaammik tunineqarneranni lagkageqarlunilu kaffeqarpoq. 

”Piginnaasatigut uppernarsaatinik tunineqarnera assut nuannaarutigaara, suliffissarsiornissannummi iluaqutigisussaallugu nalunngilara,” Johansinnguaq Schmidt, Ulloq naallugu atuarfimmi 10 klassimik naammassinneqqammersoq oqaluttuarpoq. 

Ulloq naallugu atuarfik ukiumi atuarfiusumi 2005/2006-imi aallartippoq, atuartunullu naliginnaasumik silassorissusilinnut immikkulli atuartitsinermi nalginnaasumik atuartitsissutigineqartartuniit allaanerusumik atuartinneqarnissamik pisariaqartitsisunut neqeroorutitut atuarfiulluni. Atuartitsineq atuartunut ataasiakkaanut naleqqussarneqartarpoq, tassa inuttut ataasiakkaatut pisariaqartitat isiginiarneqartarlutik. 

Piginnaasatigut uppernarsaatit imminut tatiginerulersitsisarput

Open Collage Network, OCN, periusiuvoq, atuartunik piginnaasatigut uppernarsaateqartitsisumik pisortatiguunngikkaluarmik atuartitsinermik piginnaasaqalersitsinermillu ingerlatsiviusartoq. Assersuutigalugu tassaasinnaalluni illumi suliassatigut piginnaasaqalerneq, taamaalilluni atuartoq kantiinami iggavimmiluunniit suliffissarsiorsinnaanngorluni. 

”Skandinaviami misilittakkat takutippaat, atuartut OCN-uppernarsaammik tunineqarsimasut, suliffissarsiortussanngoraangamik imminut tatiginerulertarsimasut ujartuinerulertarsimasullu” Maassa Geisler, Ulloq naallugu atuarfimmi siunnersortitut sulisoq ilinniartitsisuusorlu oqaluttuarpoq.

Immikkut ittumik atuartinneqartunut sakkussat pingaarutillit

”OCN aqqutigalugu atuartut naliginnaasumik nalilersuissutaaneq ajortunik piginnaasatigut pisortatiguunngikkaluarmik uppernarsaammik tunisinnaavagut, tamannalu immikkut atuartitsinermi amigaatigisartagarput sakkussaavoq pingaarutilik. Angajullerni atuartunut (aaqqissuisoqarfik, 8 -10 klassit) OCN maanna neqeroorutigisarparput, taamaalillutik meeqqat atuarfianni atuarnermi naggataani OCN-uppernarsaatisinissamut qaffassarsinnaallutik, taakkulu nalinginnaasumik misilitsinnermi uppernarsaatini ilanngunneqarneq ajorput, taamaattorli inuiaqatigiinni ingerlariaqqinnissaannut iluaqutigissallugit” Maassa Geisler nangilluni oqarpoq.

2019-imi ukiakkut Ulloq naallugu atuarfimmi OCN misiliutitut ingerlanneqassaaq, aamma ukioq atuarfiusoq 2020/21-mi kommunip sinnerani immikkut atuartitsinermi atuartunut angajullernut atuutilersinneqassaaq.