Asarissuup ataani illarpalaannguaq meeqqeriviup iluani tusarsaavoq, Nuummi meeqqerivinni pisoqaanerpaaq Ernutaq najuuffigaarput.
Meeqqat inimi issiallutik illarasaarlutik nererujoorneranni, Nukannguaq Grønvold ataatsimeereerluni matukkut iserpoq, isersimasullu ilassillugit.
Nukannguaq Grønvold meeqqerivimmi ikiortitut sulisarpoq, meeqqallu paaqqutarisarlugit angajoqqaat sulineranni.
”Meeqqat angajoqqaaminut ungasut saammarsartarpavut, uannullu nuannernerpaasarpoq, meerannguit qiasut saammartipallassinnaagaangakkit”.
Meeqqerivimmi meeqqat 17-it takkussimapput tamarmillu nerrivinnut marlunnut agguataaqqallutik issiallutik.
”Ullumikkut aasaanera ilutigalugu meeqqeriviit marluk katullugit misilippavut, meeqqerivik Sisimeersut takkunnikuupput, ullumikkullu peqatigissavagut”.
Nukannguaq Grønvold massippoq niviarsiararlu anaanaminut ungasoq saaammarsariartorlugu, assinik isiginnaaqatigaa, sivitsunngittorlu niviarsiarannguaq qiimmappoq.
”Uannut pingaaruteqartorujussuuvoq meeqqanut toqqissisimasumik paaqqutarinninnissaq, soorlu meeqqat toqqissillutik maaniinniassammata ”.
Nukannguaq Grønvold suleqatinilu meeqqanik paaqqutarinninneq kisimi isumagineq ajorpaat, allanimmi aamma suliassaqartarput.
”Ullaaq manna nal.7 suliartoratta suna tamaat pissusissamisut innersoq misissorparput, soorlu silami meeqqat pinnguartarfiat alakkartuaannarparput, unnuakkummi inoqartarami, arlaanillu ulorianartunik eqqaasoqarsimanersoq alakkartertarlugu”.
Nal. 9:45 meeqqat nipaarupput, atii taajorneqarput ullormullu pilersaarut saqqummiunneqarmat, meeqqat nuannaarnerat inimi tusarsaavoq.
Nukannguaq Grønvold meeqqat nassuiaaqqammerpai nuutoqqamut qaqqasiorialaassasut, pilersaarullu tigulluarneqarluni.
”Misigissuseq nuannernerpaasarpoq meeqqat nuannaraangata, misigissuserlu annernarsinnaasarpoq meeqqat ajoquseraangata, tassami nammineq qitornatulli paaqqutarisaratsigit”.
Meeqqat perusuersartarfimmut tulleriaalerput, naammassisullu aninissaminut piareersarlutik, silagissuullu ataani aneerluarnissaat qularutissaanani.
Meeqqerivik Ernutaq illoqarfiup qeqqani inissisimavoq meeqqallu pingasut tallimallu akornanni ukiullit taakaniittarlutik.