Ulluni makkunani Kommuneqarfik Sermersuumi borgmester Charlotte Ludvigsen Tasiilamiippoq, ilaatigullu inuusuttunik naapitaqarpoq unnussiuaaqatigalugillu.
Naak inuusuttut amerlanngikkaluartut, unnuk nuannersumik ingerlanneqarpoq. Naatitat, safti, boorlut, kaffi the-lu unnuup ingerlanerani sassaalliutigineqarput.
”Qanittumi borgmesteritut ivertinneqarpunga, borgmesteriusimasup Asii Chemnitz Narupip tunuarnerata kingorna. Borgmesterinngoramali kissaatigisimavara inuusuttunik naapitaqarusullunga oqaloqateqarusullungalu. Peroriartornera eqqarsaatigalugu inuusuttunik naapitserusussimavunga imigassamik ajornartorsiorfiusumi peroriartortuulluni qanoq allannguisoqarsinnaanersoq, angusaqarusukkaannilu anguneqarsinnaanerat upperalugu. Meeraasimanera inuusuttuusimaneralu ilissinnut oqaluttuarilaarusuppara”, Charlotte Ludvigsen oqarpoq.
32-nik ukiulik Charlotte Ludvigsen nangippoq ”Inuuninni sakkortuunik misigisaqartarsimavunga aamma inersimasunngoreernerma kingorna, taamaattorli misigisat taakku nuanniitsut aamma nukissamik tunisisimapput. Inuunitsinni assigiinngitsunik toqqagassaqartuaannarpoq, namminerlu aalajangertussaavarput nalaatavut nukittorsaatigissanerlutigit immaqaluunniit ileqqupalaanik ingerlatitsiinnassanerluta. Immissinnut upperissaasi immissinnullu asassaasi”, borgmesteri oqarpoq.
Naak inuusuttut amerlanngittut peqataangaluartut unnuk nuannersumik ingerlavoq, ilaatigullu aamma pinnguaatinik pinnguartoqalaarluni.