Innuttaasunut

7. B Nuup oqaluttarisaanerani pisuttuarput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Kulturikkut Isumasiorfik aqqutigalugu, Atuarfik Hans Lyngemi 7.B Nuutoqaq pillugu paasisassarsioput.

Atuarfik Hans Lyngemi ilinniartitsisup Elisa Lethip, Kommuneqarfik Sermersuup Kulturikkut Isumasiorfimmi sammisassaqartitsinermi neqeroorutinik atorluaasuuvoq. ”Isumaqarpunga meeqqanut tulluuttunik nassaassaqartuaannartoq. Qiajuk Studiomi qitinnermik workshop atornikuuarput Nuummilu Eqqumiitsulianik Saqqummersitsivimmi assinik misissueqqissaarneq misilinnikuullutigu. Maani Nuummi Katersugaasivimmi Nuutoqqami takorniariarneq ingerlatereerutsigu, Timip ilisimanera aamma meeqqanut misilitsissallugu eqqarsarpunga.”

AHL-imi 7.B, soorlu ilinniartitsisuat oqartoq, Kommuneqarfik Sermersuup Kulturikkut Isumasiorfikkut neqeroorutaanik atuikulasuupput. Ataasinngorneq 26. februar 2018, Nuummi Katersugaasivik pulaarpaat illoqarfitsinnik paasisaqarfigerusullugu. Pernille Krutzmann katersugaasivimmeersoq siuttoralugu, ilinniartitsisortillu Nuutoqqami illutoqqat akornatigut pisuttuarput.

K.G.H.-p nalaanilli illut akornisigut Pernillip meeqqat angallappai aqqutaanilu unittarpoq, ukiunilu uuntritilinni kingullerni marlunni Kalaallit Nunaata Nuullu oqaluttuarisaanerani pisimasut pingaarnerit oqaluttuarisarlugit. Hans Egede qanga Kalaallit Nunaannut piva? Sooruna tamaannartoq; imaluunniit qanga Nuuk tunngavilerneqarpa? Pernillip meeqqat aamma Qivittup illuanut, 1833-imi sananeqarsimasumut, pulaartipai, tassani Ole Christiansen peqatigiiffimmit Nuummi Eqqaamasaneersoq, 1950-ikkunni Nuummi inuunerup qanoq ittuusimaneranik oqaluttuartinneqarluni.

Meeqqat 7. B-meersut 21-iusut Nuutoqqami pisuttuarnertik, Nuummi Katersugaasivimmi naammassivaat, tassani katersugaasiviup pitsortaa Vinni Sølvblad, Nuuk Nuutoqarlu pillugit nalorsittaarinissamut piareersaasimalluni utaqqivoq. Malunnarporlu meeqqat pisuttuarnerminni tusarnaarluarsimasut. ”Assut pissanganarpoq!” 7. B-mi niviarsiaqqat ilaat oqarpoq, atuaqataalu isumaqataapput pisuttuarnerminni Nuuk pillugu paasisarpassuatik nuannernersaasut.

Kulturikkut isumasiorfik

”Kulturikkut Isumasiorfik – atuarfeqarifnnut kiffartuussivik” ulluinnarni atuartitsinermi nutaaliorsinnaaneq, atuartitsissutinillu kulturimut tunngasunik neqerooruteqarnikkut, atuartunut amerlanernut sunniuteqarsinnaanermik siunertarineqarpoq. Kommuneqarfik Sermersooq maannakkorpiaq Kulturikkut Isumasiorfik aqqutigalugu 14-nik assigiinngitsunik neqerooruteqarpoq. Meeqqat atuarfiani atuartunut tamanut toqqagassaqarpoq uanilu nanineqarsinnaalluni Kulturikkut Isumasiorfik.