Innuttaasunut

Nuummi upalungaarsimanermut pisortap tullersortaatut atorfinittoq: 5 minutsip iluani nalunartuaannarpoq susoqarsinnaaneranik

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

53-inik ukiulik Jakob Petersen, Nuummi peroriartortoq, 1.juli aallarnerfigalugu upalungaarsimanermut pisortap tullersortaatut atorfinippoq.

Jakob Petersen nillattaartitsilerisutut ilinniagaqarpoq, 1988-imiillu sulinermi saniatigut qatserisartutut sulisimalluni aammalu Kangerlussuup mittarfiani upalungaarsimanermut aqutsisutut misilittagaqarluni.

”Qatserisartunngornissara soqutigilerunarpara Mogens Trollep oqaluttuuttarnikuummatigut qatserisartuunini pillugu, taanna 1960´ikkunni Nuummi qatserisartuusimasoq, taassumap soqutiginnilersikkunarpaanga.”

Jakob Petersen ukiorpassuarni qatserisartuunermini misilittagaqarpoq,  misigisimasaalu nuannersut nuanniitsullu amerlapput.

”Ikuallattoqartillugu inuit ikuallattumiit aniagaangata uagut isertarpugut. Suliffik soqutiginartuuvoq allanullu ikiuinissamut tunngalluni. 5 minutsimi iluani suna tamarmi allanngorsinnaasoq ilikkarnikuaarput.”

“Ullut 15-nissaani maani sulereerpunga, massakkullu Nuummi nunaqarfiinilu marluusuni Kapisillit Qeqertarsuatsiaallu upalungaarsimanermi eqqumaffigisassat misissorlugit aallartillunga.”

Ineriartorneq ilutigalugu upalungaarsimaneq ineriartortariaqarpoq.

”Illoqarfissuarput ineriartorpoq, naatsorsuutigineqarporlu innuttaasut 30.000-it missaat tikinneqarumaartoq 2030-imi, taamaammat pilersaarluta aallartissaagut, taavalu mittarfissuartaartussaalluta upalungaarsimaneq aamma tassani inerisassaaq.”

Jakob Petersen sunngiffimmini umiatsiamik aappani ilaqquttanilu angalaaqatigalugit nuannarisarivaa.