Kommuneqarfiup Allaffiani betjenti nakkutilliisuusoq

Anthon Joelsen Kommuneqarfiup Allaffiani betjentini pingasuusuni, nakkutilliisutut sulivoq, qinersinerup eqqissisimasumik torersumillu ingerlanissaa isumagivaa.

”Qinersivik arlaannaanulluunniit attaveqarnermik nittarsaassiffiussanngilaq, taavalu inuit partiip erfalasuinik pullattakkanilluunniit nassarlutik iseqqusaanngillat, taamaattumik qinersisartut qinersiartornerminni tamakkua nassassanngikkaat paasiteqqullugu maaniippugut”, Anthon Joelsen oqaluttuarpoq.

Maannakkut arfineq-pingajussaa Kommuneqarfiup Allaffiani betjentitut nakkutilleeqataavoq. Maani isaarissap eqqaani nikorfavoq, inuillu iseraangata ilassisarlugit. Anthon Joelsenip nakkutigisassaasa aamma ilagaat inuit aalakoorlutik qinersiartortut. ”Qinerserusukkaluartut ajuusaarnarpoq, kisianni aalakoorpallaarpata imaluunniit nipituallaamik oqaluppata, allatut ajornartumik anisittariaqarpavut, inuit aalakoorpallaat qinersisinnaanngillat”, Anthon Joelsen nassuiaavoq.

Kommuneqarfiup Allaffiani betjentitut suligaanni qinersinerit tamaasa nakkutilliisuunissaq pisussaaffiuvoq. ”Uagut tassaavugut qinersinermi taasinerit tamarmik kisinneqareeraangata matusillutalu qamitsisartut. Qinersivik qimaleraangatsigu suut tamarmik torersuutinneqassapput ajunngitsumillu isikkoqartinneqarlutik”, Anthon Joelsen nassuiaavoq.