Nuutoqqamik ilungersuutiginnittoq toqukkut qimaguppoq

Tusagassiortuusimasoq, atuakkiortoq aamma Kulturimut, Ilageeqarnermut Ilinniartitaanermullu Naalakkersuisuusimasoq Stephen Heilmann sivikitsumik napparsimareerluni - 77-inik ukioqarluni toqukkut qimaguppoq.

Stephen Heilmannip nipaa KNR radiomi ilaatigut radioaviisimi aamma KNR radio-p kulturimut immikkoortortaqarfiani ukiorpassuarni ilisarisimaneqarpoq.

Soraarninngorami piffissani peqatigiiffimmut ”Nuummi Eqqaamasat – Nuuk lokalhistoriske forening” ilaatigut Nuummi illoqarfiup pisoqartaata aamma Nuutoqqamik taaneqartartup ataannarnissaanik ilungersuutiginninnermut atorpaa.

Aamma Aqqaluup Aneerasaartarfiani nutaamik Inatsisartut illorsuanik sanaartortoqarnissaanik pilersaarutip unitsinneqarnissaanik atsiortitsiortornermi siuttuuvoq. Atsiornernik katersereernerup kingorna Stephen Heilmann tusagassiutinut oqaatigaa: ”Nuutoqqap tamakkerlugu eqqissisimatinneqarnissaanik ilungersuutiginninnitsinni alloriarneq tulliuttoq tassaavoq, Hans Egedep Aqqutaaniit Orsiviup Nuunngua tikillugu innuttaasut akissallit kisimik pinnatik innuttaasuniilli kikkunnilluunniit atorneqarsinnaajuarnissaannik  - ilungersuutiginninnissarput. Tasersuarmiit Orsiviup Nuunngua tikillugu Nuup tunngavilerneqarneraniilli piupput”, ilaatigut oqaatigaa.

Kommuneqarfik Sermersuumit Suliniuteqartumut Kajumissaat tunniunneqartartoq Nuummi Eqqaamasanut 2015-imi tunniunneqarpoq, peqatigiiffiummi Nuup oqaluttuarisaaneranik soqutiginnilersitsisuuvoq, taamaattumillu kajumissaaserneqarnerat pissusissamisuuginnarluni Nuummimi Nuup Katersugaasivia pilersinneqarpoq.

Stephen Heilmannip toqukkut qimagunneratigut Nunatta oqaluttuarisaaneranik ilungersuutiginnittumik Nunarput annaasaqarpoq. Inuiaqatigiinni takussaajuartarnera maqaasinassaqaaq.

Stephen Heilmannip nuliani, qitornani ernguttanilu qimatarai.

Stephen Heilmannip eqqaaneqarnera ataqqinartuuli.

Asii Chemnitz Narup

Kommuneqarfik Sermersuumi borgmesteri