Nuummi eqqakkat 27 tonsit

Ukioq manna upernaami angisuunik eqqakkanik katersineq 20. maajimit 7. juunip tungaanut ingerlanneqarsimavoq. Ukioq kingullertut innuttaasut namminneq najukkaminni aamma inissiaatileqarfinneersut pequtaminnik aamma najugaqarfiit eqqaanni saliinermit igitassanik aalleqqusillutik sianersinnaasimapput. Inuppassuit tamanna atorsimavaat; Eqqagassaleriffiup piffissami tamarmi eqqakkat  27 tonsit sinnerlugit oqimaassusillit aasimavai – ukioq kingullermit 10 tonsinik oqimaannerupput. Innuttaasut inissiaatileqatigiillu 137-t aaqqiineq atorsimavaat.

Eqqagassaleriffik aamma meeqqat Saligaatsuanni Nuummi katersortarfimmi ingerlanneqartumi peqataavoq. Illoqarfiup paaqqinnittarfiinit atuarfiinillu kiisalu ilaquttanit kikkulluunniit meeqqat suliassat pissanganartut kommunip, Avatangiisinut Naalakkersuisoqarfiup Pinngortitaleriffiullu piareersarsimasaannik suliaqarnissaminnut – pinngortitallu sapiitsuliortartuisa ilaasa ilassiniissaannut qaaqquneqarsimapput.

Kommunip saqqummiiviata eqqaani meeqqat Eqqagassaleriffiup ilisarnaatigilersimasaa, eqqaanermik nersussuaq kusanartoq sungaartoq aappaluartoq Knora naapissimavaat – meeqqat inersimasullu ulluinnarni eqqagassat naammattoortakkatta eqqaavimmut katersuiffimmulluunniit eqqortumut igissinnaanerlugit misiligarsimavaat. Tamanna assut pikkoriffigisimavaat, pinngortitamullu ajoqusiinngitsumik qanoq ililluta eqqagassat sumut igittassanerigut pillugit oqatigiinnissamut tamanna periarfissiivoq. Inersimasunut saqqummersitsoqarpoq, tassani takuneqarsinnaavoq qassutit qanoq ilillugit plastikkiliarineqarsinnaanersut, Eqqagassaleriffiup issiavittai qorsuit taakkuninnga ilaatigut sanaajupput.

Meeqqanut piumasunut eqqaasartoq nersussuaq qalipanneqarsinnaasimavoq, eqqugassartalimmik. Amerlasuullu qalipaasimapput. Eqqagassaleriffiup titartakkat kusanartut amerlasuut pillugit qujaniarpoq – toqqaanissaq assut ajornarsimavoq. Ajugaasut toqqarlutik saaffigineqarumaarput, Eqqagassaleriffimmullu eqqukkatik aasinnaavaat.