Atuarfiup pisortatsialaa: Killitsinnaqaaq tupaallannarlunilu

Torbjørn Ydegaard Ittoqqortoormiini Ejnar Mikkelsenip Alivarpianeersoq ”Atuarfimmi ukiup pisortatsialaatut” Kommuneqarfik Sermersuumit toqqarneqarpoq.

”Taama pineqarnissara takorloorsimanngikkaluarpara! Killitsinnaqaaq tupaallannarlunilu”, taama oqarpoqTorbjørn Ydegaard.

Akissarsisinneqarnissamut innersuunneqarnerani ilaatigut ima allassimasoqarpoq “Inuiaqatigiit atuarfimmi peqataatinneqarnerunissaat annertuumik suliniuteqarfigisimavaa kiisalu atuartut nunarsuarmioqataanermik misigitinneqarnissaat suliniuteqarfigisimavaa ilaatigut Islandimi atuartut sungiusarlutik sulinermik ingerlatsisinnaalernissaat pilersissimallugu”

Torbjørn Ydegaard: ”Inuiaqatigiit akuunerulersippagut ilaatigut atuarfik takornarianut ammaallugu, ingammik umiarsuarmut ilaallutik takornarissat eqqarsaatigalugit. Ilaatigut nalunnginnakku takornarissat inooriaaseq nalinginnaasoq takorusuttarmassuk annermilli atuarfik aamma takorusunneqartarmat. Kisiannili aamma atuartut takornarissanut tuniniagassanik annikitsualunnik sanalunnermik ilinniarfigisarmassuk. Annertuumik tamanna ilikkagaqarfiusarpoq: Takusinnaalerpaat takornarissat aamma aningaasannanniarfiusinnaasut. Misigilersinneqartarput tuluit oqaasii atortariaqartarlugit atuarfimmi atuartitsinerup iluani kisimi tamanna pinnani. Niuertutut akinik naatsorsuinernik sungiusaatigisarpaat nunat allat aningaasaat eqqarsaatigalugit kisitsinerit assigiinngitsut ingerlattarlugit.”

Tamatuma saniatigut atuarfik Aalisarnermut Piniarnermullu Naalakkersuisoqarfimmut ukiumut ataasiarluni imminut illersorniarluni nannumik aallaannissinaanermut akuersissummik isumaqatigiissusiorsimavoq.

”Atuartut amermik qapiarnermik panersiinermillu ilinniarfigisarpaat. Tamatuminngami angerlarsimaffimminni sungiusarneqarneq ajoramik ammip nalituallaarnera pissutaalluni. Aammattaaq piniarnermut atortunik suliaqarnermik piniartut pikkorissut ikiorsiullugit ingerlatsisarpugut – qamusiornermik pooqattaliornermik, pituutsiornermik anuliunermillu ilinniartarluta”, taama oqarpoq Torbjørn Ydegaard.

Ukiuni 11-ini Ejnar Mikkelsenip Alivarpianeersut atuartut Islandiliartarsimapput ilinniartoqarfiit suliffeqarfiillu pulaariartorlugit.

“Ilinniartitaanermut Naalakkersuisoqarfimmi atuartunut avinngarusimasumeersunut siunissaq eqqarsaatigalugu ilinniarfiit suliffeqarfiillu eqqarsaatigalugit tarrarsorfissaalatsisunut angalanissamut aningaasanik immikkoortitsisoqartarpoq. Aningaasat pineqartut nunatta iluani atorneqartussaagaluarput, Islandikkoortuartarnerpulli eqqarsaatigalugu immikkut akuerineqarluta Akureyriliarsinnaasarpugut. Tamatumani atuartut annerit ilinniartoqarfiit suliffeqarfiillu tikeraartarsimavaat. Ingammik teknikkimik ilinniarferujussuaq amerlasoorpassuarnik sullivilik atuartunut annertuumik ilinniarnissamut periarfissalippassuusoq uisitsisarpoq. Ilinniarnertooqarfik universitetillu alakkarneqartarput. Suliffeqarfiillu assigiinngitsut pulaarneqartarput soorlu mittarfik, pinnersaasiorfik takornariartitsivillu pulaarneqartarput”, taama oqaluttuarpoq Torbjørn Ydegaard.

Atuarfimmi ukiup pisortatsialaa 5.000 kr-nimik aningaasartalimmik akissarsitinneqarpoq, naasunillu tunineqarluni.