Ukioq manna ilinniartitsisoq: Meeqqanit nuannarineqarluartoq

Kommuneqarfik Sermersooq ”Ukioq manna ilinniartitsisumik" toqqaavoq, nersornaallu ilinniartitsisutut siunnersuisartumut Anette Mølbæk Bromanimut, Tasiilami 7. klassimi atuartunut klasselærerimut, tunniunneqarpoq.

Innuttaasut ilinniartitsisumik meeqqat atuarfinni meeqqanut allanngueqataasartumik, kajumissaarisartumik isumassarsisitsisartumillu piukkunnartumik saqqummiussinissaminnut periarfissinneqarsimapput. 

Tasiilami Alivarpimi atuarfiup pisoraa, Nukànguak' Kristiansen oqarpoq: ”Anette Mølbæk Broman ukioq kingulleq Pinnguarnermik ingerlatsisut pilersippai, tamannalu assut iluatsilluarsimammat nunaqarfinnut tamanut siaruartinnissaa ukioq manna sulissutigisimavarput. Angusarissaarsimaqaarlu, maannalu Kuummiini, Sermiligaami Kulusummilu namminneq pinnguarnermik ingerlatsisoqalernikuuvoq”.

Pinnguarnermik ingerlatitsisut anitsiartarfinni ataatsimoortukkaat assigiinngitsut pinnguartittarnerinik aaqqissuussisarput. Assersuutigalugu meeqqat anitsiartarfimmi immikkoortumi aalajangersimasumi arsamik pinnguartarput høvdingebolderlutik, immikkoortumi allami arsartarput immikkoortumilu allami pattaanneq ingerlattarpaat.

”Pinnguarnermik ingerlatsisoqalernera kingorna anitsiartarfinni qissattut pisoqallattaanerillu takussaajunnaapajaarsimapput, atuartullu amerlanerit nuannaarlutik anitsiartarput”.

Tamatuma saniatigut Anette Mølbæk Bromanip aaqqiagiinnginnermik pakkersimaarinninneq inunnik ataasiakkaaraluni oqaloqatiginninnikkut ingerlattarpai.

”Ukioq manna annertuunik aaqqiagiinnginnernik pakkersimaarinninnernik arfinilinnik ingerlatsisoqarpoq. Siullermik atuartut aaqqiagiinnginnermut eqqorneqarsimasut tamaasa ataasiakkaarlugit oqaluuppai. Ilaatigut atuartut assigiinngitsunik peqquteqarlutik ikinngutigiikkunnaartarsimapput immikkoornialersimallutillu. Taakku ataasiakkaarlugit, angajoqqaat akuersissuteqarnerisigut, oqaloqatigisarpai. Naggataatigullu atuartut tamarmik aaqqiagiinngissuteqartut isumaqatigiissinniartarpai angajoqqaat isiginnaartuliullugit. Tamanna assut iluatsilluarsimavoq, atuartuutigullu arlallit eqqissisimanerullutik toqqissisimanerullutillu atuarnertik ingerlatilersimallugu.”, Nukànguak' Kristiansen oqarpoq.

Taamatuttaaq kamannaveersaarnissamut tunngasumik ingerlatsivoq, tassani atuartut kamannertik anniartitsinermut aserorterinermulluunniit atornagu allatut iliuuseqartarnissaannut ilinniartissimavai.

Anette Mølbæk Broman 7. klassit ilaanut klasselæreriuvoq, tassanilu tuluttut, matematikki inuttullu ineriartorneq ilinniartitsissutigisarpaa.

”Atuartitsinera malinnaaffigisimavara aaqqissuussaalluartumillu atuartitseriaaseqarpoq. Atuartut assut nuannaraat, soorlumi oqaluleraangat klassimi atuartut tamarmik nipaarutiivittartut tusarnaarlugulu aamma atuartut isumaat tusarnaarluartarpai oqaloqatigisarlugillu”.

Anette Broman Mølbæk Tasiilami Alivarpimi ukiuni pingasunngulertuni ilinniartitsisutut sulivoq. Atorfeqarnerminut isumaqatigiissutaasimasoq aasamut naasussaavaa, ilinniartitsisutullu soraarniarluni aalajangersimalluni.

”Kommunimi tamatsinnut annaasaq annertuvoq. Tuppallersaatigissavarpulli atuarfimmi soraareeruni Tasiilami najugaqaannartussaammat”, Nukànguak' Kristiansen oqarpoq.