2019 Inuiattut Ullorsiornermi borgmesterip oqalugiaataa

Nuummi inuiattut ullorsiorneq 2019 oqalugiaat

Asasakka ikinngutit – asasakka Nuummi innuttaasut – asasakka Kalaallit. 

Inuiattut Nalliuttorsiornitsinni pilluaritsi.

Siullermik aallaqqaasiullugu tamassi iterluarsimanissassinnik kissaallusi maani Nuutoqqami tikilluaqquassi, soorlu ileqqorput malillugu Inuiattut Nalliuttorsiornerput nalliuttorsiutigisaripput.

Soorlu nalunngikkissi oqaluttuarisaanermi Inuiattut Nalliuttorsiornerput pillugu borgmesterinngorlaatut siullerpaamik oqalugiarpunga.   Taamaattumik aamma ullumikkut ulloq uannut immikkuullarissuuvoq. 

Kommunitsinni siuttorisimasarput angusaqangaarsimasoq siuariartortitsingaarsimasorlu, qujaffigalugu suliat nangeqqissavakka, siunnerfeqarattami aaliangiuteeriikkatsinnik siunissamut inuunerunnerulernissamut qulakkeerinnittut.  Nalunngilara unammillernartoqassaqisoq ingammik isumaginninnerneq eqqarsaatigalugu kisianni tassa unammillernartut taakkorpiaat tassaapput uummateqarfigisakka.

Meeqqat eqqarsaatigalugit iliuuseqarsimavugut annertuumik, kisianni suli iluatsiffiunngitsumik – tamanna nassuerutigissavarput.  Meeqqat amerlavallaat toqqissisimananngitsumik inuunermi atugaqartut. Meeqqat innarlerneqartussaanngillat eriagisassaapput, Inuiaqatigiit kikkullunniit akuerissaanngilaat killissaanik qaangiineq.  Meqqat tassaapput siunissavut.  Uagut akisussaaffigaavut. Tassaapput  erliginerpaasagut.  

Inuiaqatigiittut ataatsimoorussilluta massakkorpiaq suliniuteqartariaqalerpugut – tamatta neriorsorta akisussaaffeqatigiissagatta meerartagut illersornissaannut.

Inuiaqatigiittut sapinngilarput – ataatsimoorussilluta.  Nalunngilara sapernata, ukiuni kingullerni ineriartorneq ajunngilluinnartumik sammivimmut tassungarpiaq ingerlasoq takoreerpara.  Killiliillutik sassartartut amerliartuinnarput.   Tapersersuisut amerliartuinnarput.  Nunatsinni tassa nukittuffipput – immitsinnut ataqatigiinnerput, pisariaqaleraagat ikioqatigiittarpugut, massakkullu tassa pisariaqalerpoq.

Neriorsussavassi: Siunnersuutit tamaasa tusarnaassavakka, peqataatitsineq suleqatigiissinnaaneq partiit tamaasa akimorlugit, allaat nunat killeqarfii qaangerlugit isumaginninnermut ajornartorsiutivut iluarsiniarlugit suleqatigissavakka.  Ataatsimoorutta nukittunerussaagut aamma ataatsimoorluta anguniagarput angusinnaavarput.  

Ajunngilaq, ullumikkut tassa Inuiattut Nalliuttorsiorpugut taamaattumik oqalugiaatiga siunissami unammilligassavut kiiisa pillugit imaqassanngilaq. 

Inuiattut Nalliuttorsiornitsinni nunarput kusanartorsuaq nalliuttorsiutigisarparput.  Nunarsuarmi angeqisumi inuiaqatigiinnguit ikittunnguuvugut kisianni aamma inuiaavugut nukittuut tulluusimaartullu.  Nunarsuarmiut  silaannaap allanngoriartornera pillugu issittumiittugut sammilersimavaatigut.  Siku avatitsinni aakkiartorpoq inuppassuarnullu pissutsinik allannguisuuvoq.  Kalaallit ilaannut qularnanngitsumik siunissaq eqqarsaatigalugu allannguutaassaqaaq kisiannili aamma periarfissat nutaat ammarneqassapput.  Isumaqarpunga takornariaqarneq eqqarsaatigalugu siunissami iluanaarutaassaqisoq.  Taamaallaat assavut isaallugit atortorissaarutit pisariaqartitat pilersikkutisigit – soorlu mittarfiit pitsaasut, umiarsualiviit misigisassarsiorfissat unnuisarfissallu.  Sammivimmut tassunga aallareerpugut tamannalu nuannaarutigaara.  Nunat amerlaqisut allangortiteralutik takornarianit isertitaqarlualernikuupput; uagut aamma taamaaliorsinnaavugut – taamaallaat pinngortitarsuaq uagullumi aamma takornariaqarnerlu nammaqatigiinnissaat isumagigutsigu. 

KISIANNI! Qaquguluunniit puigussanngilarput uagut nunarput pingaarnertut nammineq nunagigatsigu.   

Inuiattut Nalliuttorsiorneq tassaavoq ulloq uanga inuttut qamuuna qujamasunnermik attortiffigisartagara.  Maanna ukiut qulinngorput, Kommuneqarfik Sermersooq pilersinneqarmat aammalu Namminersornerulerneq eqqunneqarmat, assorsuarlu tulluusimaarutigaara ullumikkut uanga maani kangimut kitaanullu borgmesteritut nikorfasinnaagama. Tamatigut kangiata kitaatalu akornanni ataqatigiinneq pisariaqartipparput  – ataqatigiinnerlu taanna tassaavoq pisuussuterput  nalitoorujussuaq sermersuaq ikaarlugu kultuurikkut pisuussuteqarluinnartoq. Piumaguttalu anguniakkat angunissaat sapinngilarput ataatsimut.  Tassa taannaavoq siunissami tunngavissarput: Ataqatigiinneq, immitsinnut tapersersoqatigiinneq ikioqatigiinnerlu – ullut tamaasa. 

Tamannarpiaq anguniarlutigu nunatta aasarissua nalissaqanngitsoq takkutereertorlu nuannaarutigisigu.  Taama ataqatigiitsiginerput pillugu aammalu inuiaqatigiittut nukittoorsuunerput nuannaarutigisigu.  Uangami nuannaarutigeqaara tulluusimaarutigalugulu – ilissi peqatigalusi – nunap massuma ilaaniikkama. 

Aammaarlunga tamassi ullup nuannersumik atornissaanik kissaallusi Inuiattut Nalliuttorsiornitsinni pilluaqqungaarpassi.