Charlotte Ludvigsen borgmesterinngorpoq

32-nik ukiulik Charlotte Ludvigsen, Lottemik aamma taaguteqartoq, borgmesterinngortussatut kommunalbestyrelsemi ilaasortani amerlanerussuteqartunit toqqarneqarpoq

Kommuneqarfik Sermersooq borgmesterertaarpoq. Tamanna maanna borgmesteriusup Asii Chemnitz Narupip ukiuni qulini borgmesterioreerluni borgmesteritut tunuarnerata malitsigisaanik pivoq.

Charlotte Ludvigsen Kommuneqarfik Sermersuup kommunalbestyrelsiani 2015-imili ilaasortaallunilu Isumaginninnermut Suliffeqarnermullu Ataatsimiititami siulittaasuusimavoq.

Ernini Aputsiaq najugaqatigaa. Allaffissornermik TNI-mi ilinniarsimasuullunilu Naalagaaffiup Sinniisoqarfiani taamatuttaaq Inuit Ataqatigiit Kattuffianni siusinnerusukkut atorfeqarpoq.

Kommuneqarfik Sermersuup kommunalbestyrelsiani ilaasortat 19-iupput. Kommunimut 2017-imi kingullermik qinersisoqarnerani Inuit Ataqatigiit qulingiluanik (9), Siumut arfineq-marlunnik (7), Demokraatit marlunnik (2) aammalu Suleqatigiisitsisut ataatsimik (1) ilaasortaatitaqalerput.

Asii Chemnitz Narupip borgmesteritut tunuarnerata kingunerisaanik Lone Rosengreen Pedersen Kommuneqarfik Sermersuup kommunalbestyrelsiani ilaasortanngorpoq, Malene Lyngemut sinniisuulluni.