Ukioq manna CSR Greenland-ip aammaarluni suliffeqarfiit arlallit peqatigalugit nuna tamakkerlugu  eqqagassanik katersineq Saligaatsoq ingerlanniarpaa

Tassani inuit suliffeqarfiillu taakkulu sulisui saleeqataaniarlutik nalunaarsinnaapput nunaminertamillu saliiffissaminnik agguaassiffigineqarlutik. Ukioq manna ukiut qulingiluassaat taamatut ingerlatsisoqarpoq aammalu Sermersuumi Eqqagassalerivik sapinngisamik amerlasuut saleeqataanissaannik kaammattuuteqarpoq, tamattaalluta illoqarfiit nunaqarfiillu saligaatsuutinniassagatsigit. Aaqqissuineq pillugu annertunerusumik takusagaqarsinnaavutit ugguuna www.csr.gl

Nutaarluinnartut Namminersorlutik Oqartussat CSR Greenland peqatigalugu Saligaatsoq ingerlanneqalerpat Nuup Katersortarfianut meeqqanik qaaqqusipput. Tassani meeqqeriviit atuaqatigiiaallu takkullutik eqqagassat, pinngortitaq, atoqqiineq avatangiisillu pillugit ilinniartinneqassapput, pinngortitamilu sapiitsuliortut ilaat ilassillugit. Eqqagassalerivik peqataassaaq, meerarpassuillu tikilluaqqunissaat qilanaaraarput Nersussuaq Eqqaavissuarmioq Knora peqatigalugu.

Ullut tamaasa saliisarit

Eqqagassalerivimmi illoqarfiit nuannersut kusanartullu tamaasa pinngortitallu aliannaarsaarfigisarnissaa kissaatigaarput. Taamaattumik meeqqat inersimasullu tamaasa qinnuigaavut illoqarfinni pinngortitamilu angalaartillutik eqqarsarluartaqqullugit. Ataani eqqaamasassat sisamat pitsaasut qioriarlugit nivinngarsinnaasatit suliarisimavagut. Taakku pillugit ilaquttatit meeqqatillu oqaloqatigikkit, ataatsimoorlusilu avatangiiseq pinngortitarlu pillugit suleqataagitsi.

Meeqqat mikinerpaat allaat saligaatsuutitsinermi eqqiaanermilu peqataatinneqarsinnaapput. Maligassiuilluarit meeqqasilu pinngortitamik avatangiisimillu qanoq ilillutik paarsilluarsinnaanerat allanngueqataasinnaanerallut pillugit oqaloqatigiissutigisiuk.

Eqqaamasassat sisamat aajuku

  • Kangerlummiikkaangavit qaqqaniluunniit pisuttuaraangavik TAMATIGUT igitat eqqaavimmut qaninnerpaamut igikkiartortakkit imaluunniit ilissinnukaallugit eqqaavissinnut igittakkit!
  • Cigarettit kimmivii nunamut iginngisaannakkit! Cigarettit qamivinnikut cigarettinut arsakoorfinnut ikkusimasunut imaluunniit eqqaavimmut igittakkit. Siunnersuut: Nuummi Innuttaasunik Kiffartuussivimmut AKEQANNGITSUMIK cigarettit kimmivikuinut nassartakkamik aallersinnaavutit ilissinni eqqaavimmut igissinnaasannik.
  • Qimmivit anaa tigussavat - Qimmit anaat kamippammik tutisoorlugit nuanninngilaq, qimmit anaannik katersinermi puussiat tassa aatsaat torrak! Aamma eqqaamallugu puussiaq eqqaavimmut igissagakku, nunamut iginnagu!
  • Immikkut iliuuseqalaarit - Allat "katassimasaat" takugukku tigoriarlugu eqqaavimmut igikkukku pissuserissaarneruvoq.

Inussiarnersumik inuulluaqqusillunga

Sermersuumi Eqqagassaleriffik