Asii: Kim Kielsen meeqqanut atornerluinerup  akiorniarnerani siuttutut sassartariaqarpoq

Kommuneqarfik Sermersuup nunatsinni borgmesterit kiisalu Kim Kielsen Martha Abelsenilu nunatsinni meeqqanik kinguaassiutitigut atornerluineq pillugu eqqartueqatigerusullugit aggersarpai.

”Nunarput tamakkerlugu meeqqat inuusuttullu kinguaassiuutimikkut atornerlunneqartarput imalu amerlatigaat allaat nuna tamakkerlugu ajutuuinnertut oqaatigisaqariaqarluni. Meeqqat inuusuttullu nappaammik inuunermik ulorianartorsiortitsisinnaasumik eqqugaagaluarpata apeqqusersornagu piaarnerpaamik iliuuseqartoqassagaluarpoq" Kommuneqarfik Sermersuup borgmesteria, Asii Chemnitz Narup, taama oqarpoq, Kim Kielsenillu nuna tamakkerlugu iliuusissatut pilersaarusiornermi siuttuunissaanik noqqaaffigalugu.

”Kinguaassiutitigut atornerluineq, nunatsinni innuttaasunik 30-40 procentinik eqquisoq  – isumaginninnermi inuiaqatigiinnilu ajortoqarluinnarneranik tamanna takutitsivoq. Kinguaassiuutitigut atornerluinerit unitsitsinnagit inuttut, inooqatigiissutsikkut kulturikkullu piuneerussaanertut isumaqarfigaara.  Kim Kielsen siornatigut ”ukiut tamarmik meeqqat ukiorisariaqaraluaraat”  annertusiartuinnartumik suliniuteqartoqarnissaanik oqaaseqartuartuuvoq, taamaattumik ataatsimoorluta nutaanik aqqutissarsiornissarput annertuumillu suliniuteqarnissarput piareersimaffigigipput naatsorsuutigilluinnarpara.”

"Pisariitsunik aaqqiissutissaqanngilaq.  Nappaalanersuarmik taamak annertutigisumik eqqugaasoqaraluarpat, qularinngilluinnarpara isiginnittariaatsimik allaanerujussuarmik isiginnissasugut, allaat nappaalanersuup unitsinnissaanut tuniluutinnginnissaanullu sakkortuumik iliuuseqarnissaq apeqquserneqarnaviarnani. Kinguaassiuutitigulli atornerluinermi taamatut qisuariartoqarneq ajorpoq.

Ajornartorsiutit nappaalanersuartut isigineqartariaqaraluartut inuit ataasiakkaat kisimiillutik anigorniagassaattut pissusilersorfigivagut. Najukkaminni oqartussat, nammineq kajumissutsimik ikiuuttut qanigisaasullu ikiuunnissaat naatsorsuutigineqartuarpoq. 

Ukiut tamarluinnaasa amerligaluttuinnartunik aningaasaliijuarpugut, nassuerutigisariaqarparpulli kommunit kisimik suliassamik taamak annertutigisumik kivitsisinnaanngimmata.   Pissutsit piviusut taamaanneri aliasuutigeqaara. Nunatsinni Naalakkersuisut danskinit annertuumik ikiorneqarnissamik itigartitsiniarmata, susassaqartut tamarmik ataatsimoorteriarlugit Naalakkersuisut iliuusissaat tusarniartariaqarpavut” Asii Chemnitz Narup nangippoq.

”Naalakkersuisup siulittaasuata siuttutut sassarnissaa piffissanngorpoq. Arlaleriarluta Naalakkersuisunut saaffiginnissimavugut, pisariaqartitatsinnilli ikiorneqarnata –  naliliinernik nalunaarusianillu tunineqaannartarpugut. Massakkut Kommuneqarfik Sermersuumit oqartussat susassaqartullu tamavimmik ataatsimoortillugit – Kim Kielsen Martha Abelsenilu borgmesterit allat peqatigalugit qanoq iliuusseqassanersugut eqqartussagipput kaammattuutigaara.”

”Pissusipalaap inunnik amerlaqisunik kinguaariinni nukillaarsaajuarnera unitsittariaqarparput. Iliuuseqarnissamut paqumisunnerit aporfigiunnaartariaqarput.  Pissutsit piviusut isiginngitsuusaaginnarsinnaanngilavut. Nuna tamakkerlugu ajunaarnersuartut pissutsit ipput,  nappaalanersuaq timikkut tarnikkullu nukillaarsaasoq, meeraanermiit innarlerneqarneq, imminut pisuutinnermik, annilaangarujussuarnermik, inuttut kinguaassiuutitigut kinaassuseerunneranik inuiaqatigiillu akornanni tatiginnissinnaajunnaarnermik kinguneqartoq, ikiaroornartumik imigassamillu atornerluinermik, nakuusernermik, imminut ajoqusernissamik imminullu toqunnissamik kinguneqartitsisoq.  Tamanna unitsinniarli, tassa."

”Taamaattumik Naalakkersuisut siulittaasuata siuttutut sassarnissaa pisariaqarsoraara. Borgmesterit oqartussallu tamarmik, isumaginninnikkut peqqinnissaqarfimmiillu sulisut, susassaqarfiit kajumissutsiminnik suliniuteqartut qanimut suleqatigalugit iliuuseqarfigisariaqarparput ajunaarnersuarlu unitsillugulu."