Meeqqat Aqqaluup Aneerasaartarfia ilusilersussavaat

Aqqaluup Aneerasaartarfiata eqqaaniittoq nutarsarneqassaaq, meqqallu Aqqalumi atuareersunut paaqqinnittarfimmeersut Kommuneqarfik Sermersooq peqatigalugu workshoppertinneqareerput, tassanilu susoqassanersoq isumassarsiatik takutereerlugit.

Thomas Lam Illoqarfimmi Inerisaavimmeersoq Aqqaluup Aneerasaartarfiata ineriartortinneqarnissaanut pilersaarummut siulersuisuuvoq. Meeqqat piumaffigisimavai Aqqaluup aneerasaartarfia najoruminarsarneqarsinnaanissaanut kissaatitik takorluukkatillu pillugit titartaaqullugit.

Pilersaarusiornermi innuttaasunik peqataatitsineq pingaartorujussuuvoq, uanilu workshoppimi meeqqat peqataatinneqarnissaat pingaartinneqarluni.

"Ilimaginngisamit meeqqat suliamut tiguartilluarsimapput amerlasuunillu siunnersuuteqarlutik, pinnguartarfimmiit savaatilinnut tupinullu. Takullugu qanoq pilersitsigisinnaatiginersut nuanneqaaq" perorsaasoq Johanne Ezekiassen oqarpoq.

Meeqqallu pilersitaasa inerneri siunissami suliassamut ilaassapput.

"Meeqqat takorluukkatik pillugit pappialamut titartataanerminni nuannisaqaat. Assersuutigalugu sisoortafimmik pingasunik ingerlasarfilimmik peqarusupput, issakatsiaarfillu pingasunik issiavilik, tupit aammalu skatertarfik. Pinnguartarfiup pingasunik sisoortarfillip qulaani aamma illuaraqarnissaa kissaatigaat qulaatigut aneerasaartarfilimmik, isikkivik qimerluaalaarneqarsinnaaniassammat", Thomas Lam oqarpoq. 

Siunnersuutit innuttaasuneersut tamarmik katersorneqareerpata misissorneqassapput, Aqqaluup Aneerasaartarfialu ineriartortinneqarnerani ilanngunneqassallutik.

Aqqaluup aneerasaartafianik soqutigisallit allat workshoppertitsinermi ulloq 27. maj nal. 14-16 qaaqquneqassapput. Workshop Kommuneqarfiup Allaffiani pissaaq, kikkut tamarmik soqutiginnittut peqataanissaamut tikilluaqqusaapput.


_R1A2455
_R1A2462
_R1A2466 2
_R1A2475 2
_R1A2479 2
_R1A2481
_R1A2493 2
_R1A2542
_R1A2551