Katsorsaajartorlutik angalasartut: Tasiilami meeqqanik ikiuisarput

Elisabeth Wille aamma Kaalat Wilche marluullutik psykoterapeutiupput. Angalasartuupput qaammatillu tamaasa sapaatip akunnera ataaseq Tasiilamiittarlutik. Tassani meeqqat, inuusuttut taakkulu angajoqqaavi immaqaluunniit angajoqqaatsiat, ikiortariallit ikiortarpaat.

Angalasartunik pilersitsineq juunimi 2018 aallartittoq isumaginninnermut aqutsisoqarfik suleqatigalugu Kommuneqarfik Sermersuumit suliniutitut aallartinneqarpoq.

Ikiorneqarnissaq kissaatigineqarpat – ikiuuttoqassaaq

”Aallartikkatta siullertut suliaraarput, Tasiilami innuttaasunut paasissutissiissutigalugu, ikiuukkiartorluta tikittugut” Elisabeth Wille nassuiaavoq. Tamanna pillugu Elisabeth aamma Kaalat atuartut angerlarsimaffiannut pulaarput, tusarnaarnissamut ikiuunnissamillu piareersimanertik sulisunut paasissutissiissutigerusullugu.

”Meeqqat sulliavut arfinilinniit 17-it tikillugit ukioqarput. Politiit, atuarfik, peqqinnissaqarfik kiisalu Meeqqanut Ilaqutariinnullu Kiffartuussivik Meeqqanullu Ilaqutariinnut immikkoortortaq suleqatigisarpagut, taamaattumik sulianut attuumassutilippassuupput,” Kaalat Wilche nassuiaavoq.

Meeqqat ilaqutariillu innersuunneqartarput, kingornalu meeraq angajoqqaajusullu psykoterapeutiniit aggersarneqartarput. Ataatsimiinnermi psykoterapeutit oqaluttuarisarpaat peqqissartinneq (terapi) sunaanersoq, peqqissartinnissamillu neqerooruteqartarlutik. ”Meeqqat ikiorneqassanerlutik nammineq aalajangissavaat. Ikiorlugillu tusarnaartarpagut, ikiorneqarnissamulli pinngitsaalisinnaanngilagut” Kaalat Wilche nassuiaavoq. ”

Siunnersorneqarusunngitsunik ikiorneqarusunngitsunillu peqarpoq. Sooq ikiorneqarusunnginnerat sumik patsiseqarnersoq eqqoriaannarsinnaavarput, aammali 15-16-it missaani ukioqalernermi inersimasunik tatiginninniarneq ajornakusoorsinnaasarpoq. Akiorniagassaqareerluni ikiorneqarnissamik noqqaanissaq ajornakusoorsinnaasarpoq,” Elisabeth Wille oqarpoq.                      

”Imaanngilarli puigorneqartut. Suliaq Meeqqanut Ilaqutariinnullu Kiffartuussivimmit tiguneqartarmat kinaluunniit isumakkiiginnarneqarneq ajorpoq,” Elisabeth Wille nassuiaavoq.

Atornerluisoqartillugu atornerlunneqartut ikiorneqarnissamik pisariaqartitsisuni kisimiinngillat. Angajoqqaat angajoqqaarsiallu aamma oqaloqateqarnissamik psykoterapeutinit neqeroorfigineqarparput. ”Qanigisaasut amerlanerit ikiorneqarnissaq akuerisarpaat” Kaalat Wilche. ”Ajornartorsiutinik eqqartuinissaq ajornakusoorsinnaasarpoq, taamaattumillu qanigisaasut aamma ikiorneqarnissaat pingaaruteqarpoq” Elisabeth Wille oqarpoq.

Siumut aallarneq

Taakku psykoterapeutit marluullutik erseqqissaapput, inuttut aqqusaakkat pillugit annissuinissamut pinngitsaaliisoqarneq ajortoq. Qanoq ikiorneqarnissaq soorunami meeqqamiit meeqqamut assigiinneq ajorpoq. Meeraq qanoq innersoq aamma qanoq aqqusaagaqarsimanersoq apeqqutaapput” Kaalat Wilche nassuiaavoq. ”Aallaqqaammut ilungersunarsinnaasarpoq. Tatiginninnissaq pisariaqartorujussuuvoq, aqqusaakkallu nuanninngitsut oqaasinngussallugit ajornakusoortuusarpoq. Taamaattorli arriitsumik ammariartortarput, qanorlu aqqusaagaqarsimanerlutik oqaluttuarsinnaanngortarlutik. Uagutsinni anersaarfissaqartinneqartarput, tamannalu qujamasuutigisaraat malunnarpoq” Kaalat Wilche oqaluttuarpoq.

Elisabeth aamma Kaalat marluullutik maannakkut angalaqatigiipput, inuit kinguaassiutimikkut atornerlunneqarsimasut inuusuttulluunniit inuunerminni ilungersunartorsiornermik aqqusaagaqartut ikioriartorlugit. Ikiuussinnaasut amerlanerulerumaarnerat neriuutigivaat. ”Inuusuttut ilungersunartorsiorlutik qamuuna ulikkaartooqqapput, qaangiiniarnissaannullu ikiuuteqataassaagut” Elisabeth Wille oqarpoq.

Marluullutik malugisinnaavaat, katsorsaaneq inuusuttunit iluaqutigineqartoq. ”Inuusuttut inuunerminni ajunngitsumik angusaqarusuttut ikinngutitillu aniatitsivigisaraat malunnarpoq. Taamaattumik inuusuttut inuunermi ilungersunartorsiornermi akunnerminni oqaloqatigiittarnerat iluaqutaasartoq imminerminnullu patajaannerulersitsisartoq malugisarpaat” Elisabeth Wille oqarpoq.

Nukissaq annertooq

Elisabeth Wille-p aamma Kaalat Wilche-p suliartik nuannaraat. ”Tasiilami tikilluaqqusaasutut misigisimasarpugut, oqaloqatigineqartarnerpullu iluarineqartoq misigisimasarluta” Kaalat Wilche oqarpoq. ”Tasiilamiut tikilluaqqusisarnerat tupinnaannarpoq. Nukissamik nuannaarnermillu tunisisarput, misigisarlu nuannerluinnartuusarpoq. Angalasartoqatigiinnik tikittoqartarnera amerlasuunit qujamasuutigineqartartoq malugisarparput” Elisabeth Wille oqarpoq.