Kalaaliminermik pisiniarfissaaleqisarpit?

Kalaaliaraq Nuup Saavaniittoq maanna iluarsartuunneqarpoq juulillu qaammataata aallartinnerani atulissasoq naatsorsuutigineqarluni. Tungaanulli illoqarfiup qeqqani Kalaaliaraq ammasassaaq.

Ingerlatsinermut ataqatigiissaarisoq Agnes Olsen oqarpoq, Nuup Saavani kalaaliarartaassami kalaaliaqqap avatangiisai atortorissaarutaalu pingaartinneqarumaartut atuisut naatsorsuutigiumaaraat.

Aqqusaartut, tassa innuttaasut, pisiniartartutut atuisut, atuartut takornariallu igalaakkut itsuarlutik takusaqarnissaminnut periarfissaqalissapput - assersuutigalugu puisi qanoq pilanneqartarnersoq isiginnaarsinnaallutik.

Kalaaliaraq iserlugu, pisiniarfigalugu misigisaqarfigalugulu pilerinartuunissaa iluarsartuussinerup siunertaasa ilagivaat.

”Sumiiffik tassaassaartaaq kulturerput tunngavigalugu sammisassanik pissanganartunik assigiinngitsunik pisoqarfiusarnissaanut siunnersuuteqarfiusinnaasoq saqqummiiviusinnaasorlu, tassa piniartut, aalisartut tapertaraluguluunniit pinialuttartut ilaqutariiuppata kalaalimerngit pilerinarsarneqarnissaannik siunnersuuteqarsinnaapput,” Agnes Olsen taama oqarpoq.

Silaannarissarfik, errorfik natermilu imermut kuuffik ikkussuunneqassapput, tassa eqqiluisaarnermut tunngasut assut pingaartinneqassapput.

Siusinnerusukkut sumiiffinni assigiinngitsuni pilannerit nerpiiaanerillu pikkajuttarsimagaluartut maannakkut sumiiffimmi ataatsimi pilanneqarsimasunik nerpittaajarneqarsimasunillu atuisut pisinissaminnut periarfissaqalissapput.

Kalaaliaqqap ilua arlariinnik initaqartinneqarluni aaqqissuunneqassaaq. Timmissat, neqit aalisakkallu suliarineqarnissaat inissaqartinneqassapput. Tamatuma saniatigut suliarinnittarfimmiit suliarinnittarfimmut atuisunullu ilanngullugu eqqiluisaarnerpaanissamut piumasaqaateqartussaavoq. Tamanna ima paasineqassaartaaq nersutit nakorsaanit oqartussaasumit malittarisassaritinneqartut atuuttut malinneqassapput taavalu illersorneqarsinnaasumik naammassineqassallutik kiisalu nakkutilliivigineqassallutik.

Nuup Saavani kalaaliaqqap ammarneqarnissaa 2019-imi juulip ulluisa aallaqqaataanni pissasoq naatsorsuutigineqarpoq.