Isumaginninnermut siunnersortinik paarlaasseqatigiinnik iluatsilluartoq

Qaammatit marluk ingerlanerini Aalborgip Kommunianit Marianne Larsenip aamma Louise Møller Frantsenip Meeqqanut Ilaqutariinnullu Ingerlatsivimmi sulisunut misilittakkatik piginnaasatillu atorsimavaat

Aalborgimiit Nuummut ungasippoq, isumaginninnermut siunnersortilli Kommuneqarfik Sermersuup kommunitut ikinngutigisaaneersut paarlaasseqatigiillutik sulinerminni ulloq sulleq ajornaquteqanngitsumik suliatik suliarisinnaasimavaat. Kommunit marluusut akornanni paarlaasseqatigiinnermut suliniummi angisuumi isumaginninnermut siunnersortit marluk atukkavut siullertut alloriarfiupput Oqartussaaffeqarfimmilu fagchefiusoq, Peter Brix Adsersen, naammagisimaarpoq: ”Paarlaasseqatigiinneq naatsorsuutigisamit pitsaanerujussuuvoq, ulloq siullermiillu ajunngivissumik ingerlasimallutik. Matumani ilaatigut Mariannep aamma Louisep sulianut tunngatillugu pitsaasumik isiginninnerat alaatsinaattuunerallu peqqutaallutik. Suliatigut assut pikkoripput suliassaqarfimminnullu tunuliaqutsiilluartuullutik, ilaatigullu ilikkartitserusussuseqarnermisulli suliassanik tigooraasarlutik. Paarlaasseqatigiinneq qanoq nanginneqassanersoq assut pissanganarpoq, tassa uagut aalajangiisinnaasuugutta nanginneqassaaq.”

Aalborgimiit Nuummut

Isumaginninnermut siunnersortiusut marluullutik Aalborgimi immikkoortortaqarfimmi ataatsimi ulluinnarni sulisuusut ilisimatitsissuteqarluni ataatsimiinnermi siullermi nalusimanngilaat marluullutik aallarusullutik. Louiselu oqaluttuarpoq: ”Suliat ilungersunartut nuannarisuuagut, misigivugullu tunniussaqarusulluta. Taamaattoq pikkorissartitsigaangatta, suliakkerneqaraangatta ilaallu ilanngullugit takkutiinnavilluni allanngortiterisoqartussaanngitsoq misiginarpoq. Tikilluaqquneqakutsoorpugulli.” Mariannep oqaluttuarneq nangippaa: ”Suleqatit suliallu, aammali inooqatigiinnikkut. Paarlaasseqatigiinneq uatsinnit aamma assut nuannerpoq, maanilu suleqatitsinnit pikkorivissunit ilikkagarpassuaqarpugut.”

Assigiinngequteqarpoq

Kommunini isumaginninnermi sulianut tunngatillugu assigiinngequterujussuit pillugit Mariannep erseqqissaatigaa:

”Illoqarfiit akornanni ungasissuseq Aalborgimi sungiusimasatsinnut naleqqiullugu ilungersunarpoq, qanorlu pakkersimaarneqarnersoq takullugu assut ilikkagaqarnarluni. Takuarputtaaq sulisumiit aqutsisunut aqqut naanneerarsuusoq. Pitsaaqutitaqarsinnaavoq, assersuutigalugu ajornartorsiutigisaq sukkasuumik suliarineqarsinnaasumik iluarsiissutissaqartikkaanni.”

Louisep aallarteqqaarnermini innuttaasunik oqaloqateqarluni suliaqarnermini inuit unneqqarissuunerannut tupaallappoq: ”Pissutsit piviusut unneqqarissumik oqaatigineqartarput, aamma takkuttorpassuit akornanni ikiorneqarusulluinnartuusut malunnartarpoq. Eqqartorneqarusunnerli ajortartut tassaasarput misigissutsit. Paarlaasseqatigiinnermi tamakku pingaaruteqarluinnaraluarput, taamaattumik maaniinnitsinni annertuumik ukkataraavut.”

Kalaallit Nunaannik misigisaqarneq

Aalborgimiuusulli marluullutik sulinermut tunngasunik misilittagaqarneruliinnanngillat, Nunatsinnilli aamma misigisaqarput.

”Kalaallit Nunaat misigisaqarfigaarput. Pinngortitaq kusanartorsuaq, inuit pitsassuit, aamma Sermersuumi isumaginninnikkut suliat paasisimasaqarfigineri eqqarsaatigalugit. Suliatigut piginnaasanik tunniussaqarlutalu pissarsivugut, uagullu nammineq aalajangiisinnaasuugutta suleqatigiinneq nanginneqartariaqarpoq. Matumani akuutinneqartut tamarmiullutik pissarsipput,” Louise oqarpoq.

Marianne naggasiivoq: ”Aalborgimut uterutta paarlaasseqatigiinneq pillugu saqqummiussissaagut, aamma sulisunut allanut innersuutikutsuussavarput. Aamma naak nammineerluta periarfissinneqaqattaaraluaruttaluunniit allanut innersuutissavarput.”