Innuttaasunut

Marsip arfineq-pingajuani arnanut kajumissaat: UNITSINNIARLI..!

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Asii Chemnitz Narup, Kommuneqarfik Sermer­suumi borgmesteri, Inuit Ataqatigiit sinnerlugit qinerneqartoq.

Nunarsuaq tamakkerlugu Arnanut ulloritinneqartoq marsip arfineq-pingajuat ileqqut malillugit siunissami arnat naligiissitaanissaannut siuariaatit aammalu inuuniarnermik atugarisaasa qa­noq ittuunerinik malunnartitsiffiusarpoq. Ulloq taanna nunarsuaq tamakkerlugu nalliussineqartarpoq.

Kisianni Nunatsinni immikkut ittumik ajornartor­siuteqarpugut – tamatumani arnat ajoraluartu­mik eqqugaasarlutik. Kisianni arnat aamma im­mikkut ittumik naaggaarsinnaassuseqarput.

Soorunami eqqarsaatigaakka kinguaassiuuti­tigut atornerlunneqarsimasut amerlaqisut ullut tamaasa meeqqanit inuusuttunillu nalaanneqartartut – arnaappata angutaappatalu. Taamaat­tumik marsip arfineqpingajuani nunatsinni arnaqatikka kaammattorumavakka: Pissutsit aatsaat allanngortissinnaavagut, kinguaas­siuutitigut atornerluinerit unitsissinnaavagut, uagut arnat ersarissumik aatsaat naaggaar­sinnaalerutta!

Anaanavut, anaanatsinnit aanaakkuvut, ataatatsinnit aanaakkuvut, ikinngutigut arnat, sanilivut: Naaggaaritsi, arlaanik pissusissamisu­unngitsumik pisoqartilugu paasigaangassiuk. Pissusiluutit, kalaallit meerartaat kinguaariinniit kinguaariinnut kinguaassiuutitigut atornerlunne­qartuartut sakkortuumillu paarinerlunneqarlutik sumiginnagaasartut sakkortuunik atugarliortin­neqartartut unitsissagutsigit, taava uagut arnat maannakkut immitsinnut neriorsueqatigiittari­aqalerpugut, oqarlutalu maannakkut tamakku unitsinneqartariaqartut. Aammalu unitsitsinermi uagut akisussaaqataanissarput takutittariaqar­parput.

Nunatsinni naligiimmik inissisimaneq eqqarsaa­tigigaanni, neriulluaateqarpunga. Arnat inuusuttorpassuit nukissallit ingerlalluartarput, ilinniag­aqarlutik inuiaqatigiinnilu pingaarutilinnik ator­feqarlutik. Aamma taamatut ineriartortoqarner­ata ingerlaannarnissaa qularinngilara.

Kisianni kulturikkut allannguisariaqarpugut me­eqqat kinguaassiuutitigut atornerlugaasarner­annik unitsitsisariaqartumik. Tassami amerlanerit angerlarsimaffinni pisarmata. Arnaqatigiilluta, siunissami kinguaariinngortussat, innuttaaqa­titta akornanni – arnaappata angutaappatalu – amerlavallaat ukiorpassuarni misigisartagaan­nik misigisaqartinnginnissaat pilluaatsuunermillu nalaataqarnerluttannginnissaat aalajangiuttari­aqarparput.

Taamaattumik arnaqatinnut kaammattuutigaara: Ullumikkut marsip arfineq-pingajuani ima­tut aalajangeritsi : Maannakkumiit kinguaas-siuutitigut atornerluisoqarsimaneranik pasitsa-assisoqarnera, kinguaassiuutitigut atornerluiso­qarsimaneranik ilisimasaqartoqarnera maanga-annartissanngilavut. Ilisimasatit pasitsaassinitillu Politiinut nalunaarutigijartukkit. Meeraq tasik­kiullugu. Atornerluisuusoq naaggaaruk. Maanna unitsittariaqarpoq – qaninnerpaatullu taamatut iliorsinnaasut tassaapput, uagut arnat. Ullumik­kut taamatut aalajangerit. Ukiullu tulliuttut ta­manna pillugu arnaqatit oqalliseqatigikkit. Kinguaassiuutitigut atornerluisarneq – ullumikkut unitsinniagarput akiorniarlugu suliniaqatigiiffiliussa-agut. Uanga akiuiniaqataaniarpunga.

PDF