Asii: Naalakkersuisunuku ilinniartut qanoq piniaraat

Namminersorlutik Oqartussat ilinniartut kattuffiannut AVALAK-mut tapiissutit tunniuttakkatik affaannanngortikkaat Asii Chemnitz Narupip isumaa naapertorlugu iliuuseqarneruvoq paasiuminaatsoq.

”Sipaarniuteqarnerat Nunatsinni ilinniarsimasunik sulisussaaleqiffiusumi uungaannannguaq isigineruvoq paasiuminaatsoq. Kommuneqarfik Sermersuumi ilinniartutta angerlarnissaat pilerinartuussasoq anguniagaqarfigalugu suliniuteqarpugut. Taamaattumik susassaqarfik Namminersorlutik Oqartussanit sipaarniarfigineqartoq takullugu annernarpoq”, taama oqarpoq Asii Chemnitz Narup.

Borgmesterip nammineq suliniuteqarneratigut AVALAK kommunimit tapiiffigineqarsinnaanersoq Kommuneqarfik Sermersuumit misissorneqarpoq – taamaaliornikkut Namminersorlutik Oqartussanit tapiissutaasussaagaluartut tunniunneqassammata - kisianni tamanna kommuninut pisinnaatitsissut malillugu iliuuseqarsinnaaneranut akerliussaaq, ilaatigut inatsisilerituunit oqaatigineqarpoq:

”Assorsuaq uggoraara. Sulisinnaasut piukkunnaatillit pilerisaarsinnaaneri attatiinnarsinnaanerilu kommunit pingaarnersaanni pinngitsoorsinnaanngilavut, minnerunngitsumik kalaallit inuusuttut Danmarkimi piukkunnarsarluarsimasut eqqarsaatigalugit. Maanna Namminersorlutik Oqartussanit tamanna ajornarnerulersinneqarpoq – uagullu kommunitut Namminersorlutik Oqartussanit pisussaaffigineqartumik tigusinissamut mattunneqaqqavugut ” borgmesteri narrutsassimaqaluni taama oqarpoq.

”Inuusuttunuku Danmarkimiittut Naalakkersuisunit qanoq pineqarniartut, taama uannut aperinngitsoorusunngilanga. Isiginninnera naapertorlugu AVALAK-mut tapiissuteqarneq inuusuttortatsinnut ilinniartutullu atugaannut aningaasaliineruvoq, aamma inuusuttortatsinnut Danmarkimi piukkunnarsarlutik ilinniartunut ima oqarnissaq apeqqutaaginnarpoq, isumalluutigaatsigit naammassigussilu pisariaqartippatsigit. Taamaattumik Namminersorlutik Oqartussat immikkut akuersissuteqarnissaat siunnersuutigeqqunngeqaara”, oqarpoq Asii Chemnitz Narup.

Ilinniartut atugaannik pitsanngorsaanissaq nuna tamakkerlugu naalakkersuinermik suliaqartut akerlianik sulissutigissagaat Sermersuumi borgmesterimit isumaqarfigineqarpoq, taamaalillunimi ilinniarneq pilerinarnerulissammat.

”Amerlanerit ilinniagaqalernissaannut kajumilersitsiniarluta suliniuteqarnikkut ersarinnerusariaqarpugut, taamaalilluta ilinniartut angalanissaannut, angerlarnissaannut, inuussutissarsiuteqartunik allaffeqarfimmillu attaveqarluarnissaannut pitsaanerusunik periarfissiissaagut. Nunatut tapersersuinissamut soqutiginnissaagut. Ullumikkut nunamiit kalaallit allamut aallarlutik nuuttarput ikiliartorlutalu. Tamanna siuariarusunnitsinnut, inerisaarusunnitsinnut namminersulivikkusunnitsinnullu naapertuutinngilluinnarpoq. Kalaallit Nunatsinniit iliuuseqarnissaq pisariaqarpoq, aamma inuusuttortatta ilinniagaqarusuttut pikkorilluinnartut tatigalugit isumalluutiginerinik atorfissaqartinnerinillu sukumiisumik ersersitsiniaanissarput pisariaqarpoq Nunatsinnimi pikkoriffii piginnaasaalu tamaasa atorfissaqartippavut”, Sermersuumi borgmesteri aalajangersimalluni oqarpoq.