Tasiilami inuusuttut marlunngormat pisuttuartillutik nannumit perlilersumit saassunneqarput.
Pisimasoq qujanartumik piviusuunngilaq sungiusarnerullunili.
Isumassarsisuusoq inuusuttunut siunnersorti Hans Poul Andersen oqaluttuarpoq: ”SAR-imik sungiusarneq inuusuttut peqatigalugit ingerlanneqassasoq aalajangerpugut, taamaalilluni inuusuttut sungiusarneq piviusumik qanoq ingerlasarnersoq paasiniassammassuk”.
Sungiusarnermi pineqarluni inuusuttunut siunnersortit Nina Jonathansen, Egon Poulsen aamma Hans Poul Andersen kiisalu sullitaat inuusuttut arfineq marluk 13-it 17-illu akornanni ukioqartut pisuttuartillutik nannumit perlilersumit saassunneqartut.
Saassussineq Tasiilamiit 10 kilometerisut ungasitsigisumi Imerdivarimi pivoq. Pisuttuaqatigiit politiinut attaveqarput, politiillu akunnerup affaa qaangiuttoq ikiuukkiartorlutik apuupput. Saassunneqartuni inuit pingasut annertuumik ajoquserput ataaserlu toqulluni. Ajoqusersimasut toqusorlu kiisalu sinneri tupassimaqisut qatserisartut qamuteralaannik napparsimaviliaanneqarput.
Inuusuttut inuttaaffimminnut pimoorussilluaqaat piumassuseqarluarlutillu. Ketchup-mik 5 literimik pisivugut inuusuttullu ketchup-mik tanillugit, aattut isikkoqarniassammat”, Hans Poul Andersen oqarpoq.
”Inuusuttut misigisaqarlualaavipput, takullugulu oqartussat qanoq suleqatigiittarnersut. Sungiusarneq naammassimmat peqataasut napparsimavimmut qaaqquneqarput, tassanilu kaffi, tii kaagit sodavandillu sassaalliutigineqarlutik aamma sungiusarnerup ingerlannera pillugu isummersoqatigiittoqarpoq.
Sungiusarneq Tasiilami Meeqqanut Ilaqutariinnullu Kiffartuussivimmeersunit inuusuttunut siunnersortinit, atuarfimmit, politiinit, qatserisartunit napparsimavimmiillu aaqqissorneqarpoq.