Nuummi takornariaqarnerup iluani atortorissaarutit pitsaanerusut pisariaqartinneqarput. Ilaatigut pineqarput allagartarsualersuinerit, pisuinnaat aqqutissaannik nutarterinerit takornariaqarnermilu piukkunnaatit allat ineriartortinnissaat.
Kommuneqarfik Sermersuumi kommunalbestyrelsip 2019-mi to (2) millioner koruunit illikartippai takornariaqarnermut atugassarititat pitsanngorsaaviginissaannut.
Aningaasat ilaatigut pisuinnaat aqqutissaasa nutarsarnissaannut atorneqassapput. Taakku Nuummi innuttaasunut nuannaarutaallutillu iluaqutaassapput, aammali takornarianut ukiut tamaasa aggerlutik pinngortitamik misigisaqariartortunut.
Ukiuni makkunani Kommuneqarfik Sermersuumi takornariaqarneq qitiutinneqartorujussuuvoq. Taamaammat takornarissanut Nuummi sumunnarfissat paasiuminartuussapput. Piffissami sivitsortumi pitsaanerusumik allagartarsualersuinerit ujartorneqartarput. Maanna tamanna kommunalbestyrelsimit akuersissutigineqarpoq.
Banki sumiippa?
Atuisunut allagartarsuit allagartarsuillu aqqutissamik tikkuussisut, banki qaninneq sumiinnersoq, perusuersartarfiit imaluunniit isikkiviit pitsaasut sumiinnersut takornarissanit pinngitsoorneqarsinnaanngillat. Taamaattumik siunissami illoqarfiup iluani kikkunnilluunniit takuneqarsinnaassapput allagartarsuit aqqutissamik tikkuussisut.
Nuummiinnaanngitsoq takornariaqarnerup iluani iliuuseqarnerit iluaqutaassapput. Aammattaaq qularnaarneqassaaq takornarissat Nunatsinnut ukiut tamaasa tikittartut nunaqarfinnit nuannaarutigineqarnissaat. Aningaasaliissutit ilaasa nunaqarfinni atortorissaarusersuinermut illikartinnerisigut nunaqarfiit takornariaqarnermut pingaarutilimmik peqataatinneqarsinnaapput.
Nunatta pissarititaanik misigisaqartitsinerit
Takornariaqarnermi qanermut tuttussat mamasaakkat pillugit kommune nunat avannarliit killiit suliniutaannut ilaavoq. Ilaatigut tassani pineqarput nunani avannarlerni qanermut tuttussanik nungusaataanngitsumik piujuartitsisumillu periarfissani nukittuffiit sanngiiffiillu misissornissaat. Suliniummi takornarissat amerlanerusut kalaallit nerisassaataannik pitsaasumik misigisaqartinnissaat kaammattuutigineqarpoq.
Takornarianut umiarsuarsuarnut Tikilluaqqusisarfik aamma ikiuuttarpoq umiarsuarnik takornarissanut Nuuk sunik tunniussassaqarnersoq pillugu. Tikilluaqqusisarfik containerinik oqorsagaasunik illutaqarpoq. Taamaasillutik takornariat kialaartumut iserlutik paasissutissinneqarsinnaapput.
Anguniagaqartumik siunnerfilimmik iliuuseqarneq takornariarpassuaqalersitsisinnaavoq
Kommuneqarfik Sermersuumi Borgmester Asii Chemnitz Narup-ip takornarissanik tikittoqartarnissaa nuannaarutigaa.
”Kommuneqarfik Sermersuumi amerlanerusunik takornariaqarnissamut pilerisaarineq qitiutinneqartorujussuuvoq. Taamaattumik tunniussinnaasavut pitsanngorsartuartariaqarpavut, taamaasilluni takornarissanut pisariinnerusumik ajornannginnerusumillu nunarput kusanartoq tikeraarneqarsinnaaqqullugu. Allagartalersuinerit pitsaanerusut pisuttuartunullu aqqutissat pitsaanerusut iliuusissarpassuarnut ilaaginnarput. Siunnerfeqarluta anguniagaqarnitsigut aatsaat Savalimmiuni Island-imilu takornariaqarnikkut nallersuussinnaalissaagut,” oqarpoq.
Takornariaqarnermut politikki nutaaq aamma takornariaqarnermut periusissiaq nutaaq kommunalbestyrelsimit marlunngornermi ulloq 12 martsi akuersissutigineqarpoq.
Takornariaqarnermut politikki makkuninnga tallimaasunik anguniagaqarpoq
- Tamanut takornariaqarneq
- Pitsaasunik eqqortumillu unnuiffissaqartitsinerit piginnaasaqarnerillu
- Ornitassat pikkunartut
- Pinngortitaq kulturilu isumalluutitut inuiattullu erlinnartuutitut
- Takornariaqarneq aningaasaqarnikkut, inooqataanikkut avatangiisitigullu nungusaataanngitsisumik inuussutissarsiutaassaaq.
Takornariaqarnermut politikkimi aamma takornariaqarnermut periusissiami innuttaasut akuutinneqartareerput. Innuttaasut workshoppinut ilaatinneqarnikuupput, apeqqarissaartoqarnikuuvoq apeqqutinullu immersukkanik misissuisoqarnikuulluni. Taakku saniatigut politikki najukkami ataatsimiititanut tusarniaassutigineqareerluni.