Innuttaasunut

Politikkimi ukiut 20-it

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Asii Chemnitz Narupip ukiuni 20-ni Kalaallit Nunaanni politikkikkut sulisimanera ikinngutaasa ilaqutaasalu nalliussivaat

“Ilaanni illoqarfimmi naapitsigaangama aperineqartarpunga ´Qanoq ippa suleqatigalugu?´. Soorluuna naatsorsuutigisaraat inuusutit sakkortujaartoq pissagangalugulu suleqatigalutit qanoq innersoq. Nalunngilarali suleqatinnut atorfilittarnullu piumasaqartaravit inuit immaqa taamatut eqqarsalersartut. Nalunngilammi tamatta suli annertunerusumik tunniussaqarsinnaajuartugut. Taamatummi aallaaveqarluni sulinngikkaanni, ukiuni kingullerni qulini borgmesteriunerni kommuunitsinni ineriartorneq taamak annertugisimanavianngikkaluarpoq.” Kommunaldirektørip Lars Møller Sørensenip oqalugiaatini taamak allarnerpaa ilassinninnermullu tikilluaqqusilluni.

Borgmesterimut tupatsitsilluni ilassinninnerusussaagaluaq inuttaata ullup ingerlanerani pasittaatereersimavaa. “Sulisut tamarmik naluneraraluarpaat sooq nerisassanik taamak amerlatigisunik eqquissuisoqarnersoq. Kisiat kiinaasigut soorlu takusinnaallugu isertuussaqartut arlaallu soorlu oqarpallattoq ´Oqaqqusaanngilagummaa´. Taamaammat uatsinnut atisakka taarseriartupallappakka,” Asii Chemnitz Narup oqarpoq, assullu nuannaarpasilluni ikinngutini amerlaqisut ikinngutinilu katersuussimasut takullugit.

Kommunaldirektøri Lars Møller Sørensen 12. marts ilassinninnissamut qaaqqusisimavoq, Asii Chemnitz Narupip 1999-imi Inatsisartunut qinigaaqqaarneranit ukiut 20-inngorneri nalliussitinniarlugu.

2008 tikillugu Inatsisartunut ilaasortaavoq, tassani ilaatigut Ilaqutariinnermut Peqqinnissaqarnermullu (2003 – 2005) aamma Peqqinnissaqarnermut Avatangiisinullu (2005 – 2006) Naalakkersuisutut sulisimalluni. 2008-mi Kangia-Kitaa kommuunimi ikaarsaarnermut ataatsimiititamut siulittaasunngorpoq tassani ukiup tulliani borgmesterinngorluni.

Ilaqutaasut ikinngutaasullu – inuttut politikkimilumi, Nuummi kommunalbestyrelsip ataatsimiittarfia ulikkaarlugu takkussuussimapput. Kuupik Kleist oqaaseqartut ilagaat, ilaatigullu oqarpoq, “Inuuvutit sapiitsoq. Ukiuni kingullerni pingaartumik maluginiarsimavara, nunatsinnit nutserneq akiorniarlugu qanoq sulisimasutit. Inatsisartuni politikerit utaqqinagit aaqqiissutissamik saqqummiussisimavutit illoqarfillu Nuuk nunaqqatitsinnut periarfissatut toqqagassaalertissimallugu. Isumaqarpunga tamanna assersuutaasoq illit qanoq politikeritut salliunissat qunuginngisaannarit.”