Innuttaasunut

Tasiilami inuusuttut kulturikkut illutaarallarput

Paasissutissaq qangarnissaq

Akit, ammasarfiit, malittarisassallu il.il. uani saqqummiunneqartut qanganitsersimasinnaapput.

Marlunngornermi inuusuttut kulturikkut illuanni B2-mi ammaanersiortoqarpoq ullormilu tassani borgmester Asii Chemnitz Narup peqataavoq.

Ulloq nuannersumik ingerlanneqarpoq inuusuttullu arlallit illumut ornigupput. B2 inuusuttut utaqqiisaasumik illorissavaat aasamullu nutaamik illumik sanasoqassalluni.

”Nuannaaqaanga Tasiilamiikkama inuusuttut kulturikkut illuata ammaanersiorneranut peqataallunga. Nammineq illutaarnissarsi kissaatigisimavarsi maanilu illumi assigiinngitsorpassuarnik sammisaqarsinnaavusi nutaanillu pilersitsiorsinnaallusi. Neriuppunga illoq atorluarumaarissi. Periarfissanimmi ulikkaarpoq, Asii Chemnitz Narup oqarpoq.

Inuusuttut namminneq kissaatigisimavaat illumi fjernsyneqalissasoq ammaanersiornermullu atatillugu inuusuttut fjernsynimik tunisipput. Aamma atuagarpaalussuarnik tunineqarput, atuakkat nipilersornermut, kulturimut oqaluttuarisaanermullu tunngasut qularnanngitsumillu inuusuttut atuakkat isumassarsiorfigisinnaassavaat.

Illumi atuisoq ilaat tassaavoq 19-nik ukiulik, Marie Ignatiussen:

”Maannartarnera nuannareqaara, inuusuttut allat naapisimaalaartarlugit. Titartaanerusarpunga inukkanilluunniit pinnguartarlunga. Aamma guitarerneq ilinniarujoorpara. Guitarernermut pikkorinnerulerusuppunga. Taalliulaarnikuuvunga. Taalliakka inuunermut, asanninnermut nunatsinnullu tunngapput. Aamma dramartarpunga KRK-mullu peqataasarlunga (Kalaallit Røde Korsiat). Majip 22-ni Norgeliaqataassaanga kulturfestivalimut peqataajartorlunga tassanilu kalattoortussaavugut. Siunissami igasunngornissara eqqarsaatigaara. Maannakkorpiaq Piorsaavimmi atuarpunga”, Maria Ignatiussen oqarpoq.

26-nik ukiulik Gundine Kalia aamma Piorsaavimmiittarpoq.

”Naluara siunissami sussanerlunga. Inuusuttut kulturikkut illuannukartarpugut, kalaharluta inukkanilluunniit pinnguarluta. Mersorneq nuannaraara, tiitorfiit alleqqutaannik sananerusarpunga. Inuusuttut allat naapilaarlugit nuannertaqaaq. Sapaatip akunneri tamaasa maanngartarpugut”, Gundine Kalia oqarpoq.

Inuusuttut kulturikkut illuata ammaanersiorneqarneranut atatillugu unnukkut katersortarfimmi nuannisaqatigiittoqarpoq, nipilersortoqarluni, qittattoqarluni isiginnaartitsisoqarlunilu.