Kalaallit Nunaanni erinagissorsuaq toqukkut qimaguppoq

Ida Heinrich nuannarineqarluaatigisaminik kalaallini erinarsortartuni anguneqarsinnaanngiusartumik angusaqarsimavoq, inuilli naalagaaffigisinnaanngisaannut nappaassuarmut akiuunnerminik ajorsartinneqarpoq.

Idatut asaneqartigisoq inuiaqatigiinnillu nuannarineqartigisoq, inuusuttunnguullutik toqukkut qimagukkaangata tamatta qamuuna attorneqaatigisaqaarput. Aamma qangalili nalunngikkaluarlugu, Ida katsorsarneqarsinnaanngitsumik nappaamminut akiuuttoq, nalunngilarputtaaq ulloq nalliuppat inuiaqatigiitsinni aliasunnermik annertuumik eqquiumaartoq.

Ullormi taanna piaarpallaarujussuarluni – takkuppoq. Takkummallu Ida akornatsinniikkunnaarpoq. Maannalu aliasunneq eqqaamasallu kiserngorupput, taakkulu Idap kulturikkut pingaartitsinermigut, maligassiuinermigut qamuunalu asannissuseqarluni assissaqanngilluinnartumik tunniussimasaasulli nuannaarutigalugit ukiut ingerlanerini kissalaarnerujartuinnartutut issapput.

Erinagilluinnarnermigut klassiskimillu nipilersornermik ilisimasamigut ukiuni qulikkaanik marluusuni tunniussaqarnermigut pisuunnguallatsippaatigut, aammattaaq Nunatsinni erinarsortartunut nipilersortartunullu tamanut takutippaa, nipilersornermut tunngasunik aallutaqarneq Nunatta killeqarfiata iluani kisimi pisussaanngitsoq. Ida Nunatsinni siullersaalluni operartartunngorpoq, Nunatsinnilu tamatuminnga nuannarinnilersitsinermi saniatigut takutippaa, piginnaasaqaraanni uummateqarfigigaannilu angorusutaq anguneqarsinnaasoq.

Aamma amerlasuut ilisimavaat, Idap nuannarisaminik erinarsornermillu pimoorussisuusoq aamma niviarsiarannguusoq 12-13 miss. ukioqartoq erinagissusersua Per Rosingimit maluginiarneqarsimasoq. Taamanimiillu Per Rosingip erinarsoqatigiivini siuariartuutigisaminik ukiuni arlalinni akuusimavoq, Per-ip nammineq nassuiarpaa, tusarnertuuneratigut erinarsoqatigiinni pingaarutilimmik inissisimasimasoq nipilersornermillu ilungersuussuussisuunera nuannarinninneralu pillugit nuannarineqarluinnartuusoq, tamannalu puigunngisaannassavarput.

Ida-p taama nuannarinnitsiginini ilisimaneqaatigaa. Klassiskimik nipilersuutinik operarnermillu periarfissanik kalaalerpassuarnut ammaassisuuvoq, aammattaaq nipilersornermik erinarsornermillu avitseqateqarnissamik nuannarisaqartigineratulli – tusarnaartitsinerani tusarnaartaasa tusarnaassallugu nuannarilluinnartapaat alutorisarlugulu.

Ida, nipilersornermik erinarsornermillu alutornartunngortitsinerit kikkunnulluunniit pigilersittutut ilersippat – erinaginnikkut uummammiulerpatsigut – tamannalu pillugu qujanaq!

Ida Heinrich-ip Kalaallit Nunaanni erinagissorsuup eqqaaneqarnera ataqqinartuuli. Asannittumik eqqaamaneqartuassaatit.

Qitornatit ilaquttatillu ajunnginnerpaamik kissaappakka. Aliasunnermi tuppallersarfissaqanngilaq, nalussanngilarsili Ida nipilersuutinik erinarsornermillu nuannarisaqarluartigineratulli inuiannit kalaallinit asaneqartigimmat.

 Asii Chemnitz Narup, Kommuneqarfik Sermersuumi borgmesteri