Kommunit eqqagassalerineq pillugu suleqatigiissuteqartut

Nunatta Avannarpiaani sulisut ulluni pingasuni Paamiuniissimapput, ilaatigut eqqakkanik passussineq poortuinerlu pillugit paasisassarsioriartorlutik

”Kommunini immitsinnut ikioqatigiilluta sulisinnaagatta nuannerpoq, taamaalilluta uagut innuttaasullu naggataatigut pissarsiaqarniassagatta," Anja Svane Petersen, Avannaata Kommuniani avatangiisinut siunnersorti oqarpoq.

Eqqakkanik passussinermut tunngasut allatkommunit marluk suleqatigiissuteqarnerinut toqqammaviupput. Paamiuni illoqarfiup eqqakkanut tigooraaviani eqqakkanik passussisarneq poortuisarnerlu iluatsilluartumik 2017-imili suliarineqartalersimapput. Avannaata Kommunia maskiinanik taakkununnga assingusumik Uummannami Upernavimmilu pisisimavoq, angalanermilu siunertarineqarpoq Paamiuni misilittagarineqalersimasunik pissarsiniartoqarnissaa, taamaasilluni taakkutulli pitsaasunik angusaqartoqarniassammat.

Uummannami ingerlatsinermut tunngasunik suliaqartut ulloq naallugu eqqakkanik poortueqataatinneqarput, taamatullu paasisaqarnertik, illoqarfimminni eqqakkanik tigooraavimmik pilersitsigunik atorluarniarpaat.

Sam Shaker Abedini Avannaata Kommuniani avatangiisinut ingenøritut atorfeqarpoq, aammalu Anja Petersen nunarput tamakkerlugu angalaqatigisimallugu. Taanna ima nassuiaavoq: ”Maannakkorpiaq taamatut atugassaqartitaanatalu maskiinat pitsaanerpaamik atornissaannut ilisimasaqanngikkallarpugut. Taamaattumik angalasarsimavugut, sumiiffinni allani qanoq suleriaaseqartarnersut paasiniarlugu, aammalu pissutsit qanoq pitsanngorsarneqarsinnaanersut, suliassallu ingerlanera qanoq iliorluta assigiissarsinnaaneripput. Avannaata Kommuniani eqqakkanik tigooraaveqarfiunngitsunik pilersitsiortortoqarnissaa eqqarsaataavoq, taavalu Uummannaq aamma Paamiut angissutsimikkut assigiingajammata, taakkunani pitsaasunik misilittagaqartoqarnerata atorluarnissaa naleqquttuuvoq.”

Jonas Søndergaard tassaavoq Sermersuumi Eqqakkanik Tigooraavimmi ingerlatsisuuvoq, taassumalu Kommuneqarfik Sermersooq sinnerlugu paasissarsiorneq aaqqissuusseqataaffigisimallugu. Taassuma nassuiaatigaa kommunimi Paamiunilu eqqakkanik tigooraavimmi angerlarsimaffinnit eqqakkanik passussinermut tunngasunik aaqqissuussinerit ingerlatatik nuannaarutigineqarlutik tulluusimaarutigineqartut maanna siammarterneqalermata.

Taanna ima itisiliivoq: ”Suulluunniit pitsanngorsarneqartuaannarsinnaapput, taamatullu sulineq uninngisaannassagunarpoq. Kisianni ataatsimut isigalugu nuannaarutigaarput, pissutsit qanga atuussimasut pitsanngorsarneqarnissaannut najoqqutassamik pissarsisimagatta. Angerlarsimaffinnit eqqakkanik qitiusumik eqqaavinnut assartuisarneq ornigineqarnerpaanut ilaalerunarpoq – Kommuneqarfik Sermersooq kisiat eqqarsaatiginagu, Nunarpulli tamakkerlugu.”