Meeqqanut Atuarfeqarnermullu Ingerlatsiviup meeqqerivimmi sulisut eqqarsartaatsimikkut peqqissusaat pitsaanerulersinniarlugu misiliummik suliniummik aallartitsipput. Siullermik Nuummi meeqqeriviit marluk suliniummut peqataasimapput.
Qaammat kingulleq Nuummi meeqqerivinni marlunni workshoppertitsisoqarpoq tassani sulisunut ’Tunngaviit pingasut’ ilisaritinneqarput. Sulisut suliffimmi, tunniusimanerannut tatitussusaannullu tunngatillugu atugarissaarnerat pitsanngorsarneqarnissaa anguniagaavoq.
Naatsumik oqaatigalugu tunngaviit pingasut tarnip pissusiinut tunngassuteqarput, tassanilu inuit isumaat annertunerusumik paasisaqarfiginissaat siunertaavoq.
Tunngaviit pingasut nunani soorlu USA-mi, Canadami, Australiami, Englandimi, Skotlandimi, Spaniami, Norgemi, Sverigemi aamma Danmarkimi pikkorissarnermut peqataasut eqqarsartaatsimikkut peqqissusaat pitsaasumut sunnerneqarsimasoq takuneqarsinnaasimavoq. Pikkorissartullu assigiinngitsorpassuarnik avatangiiseqarsimapput, Amerikami parnaarussivimmiit Skotlandimi inatsisartunut.
Sunniutit pitsaasut siaruaatissapput
Periuseq taanna nutaaq kissaatigineqartutut sunniuteqassappat pineqartunut, tassa meeqqanut, iluaqutaanissaa naatsorsuutigineqarpoq.
Ilisimatuut isumaqatigiissutigigaluttuinnarpaat meeqqerivinni sulisut inuulluataaraangata pitsaanerusumik ilinniartitsillutillu isumassuilluarnerusinnaasut.