Neriuppugut juullisiorluarlusilu ukiortaarsiorluarsimassasusi. Eqqakkanik Sullisivimmiit illoqarfimmi nutaatut ileqquliussassamut peqataalluarnissassinnik kissaallusi tamassi ukiortaami pilluaritsi – taamatullu kaammattuutigaarput atorunnaakkat allaniit atorneqaqqissinnaaneri eqqarsaatiginissaanik.
Inimi orpik kusassaataajunnaarpat, peertariaqalerpallu, neriuppugut illoqarfimmi nutaamik ileqquliussaqarnissamut peqataassasutit. Piffissami 1.januarimiit 10.januari orpik atorunnaagaq ataani nunap assingani nalunaarsukkanut tunniukkiartorsinnaavat – amerlasuunik aggiussisoqarpat, immaqa orpippassuaaraliorsinnaavugut, toqquuttaaffiusinnaasumik.
Orpiup tunngavia akisooq angerlarsimaffimmiitiinnarneqassaaq, qangatoortumilli orpik tunngavilersimagukku taanna atatiinnassavat, nammineerluni napasinnaaniassammat. Suli apinerussappat aamma orpiutit apummut “kapputiinnarsinnaavat”.
Ikuallattoornissaq eqqarsaatigalugu orpik 1 januaari sioqqullugu tunniunneqassanngilaq aamma pinnersaateqartinneqassanngilaq, taamaattumik pinnersaataasa peernissai eqqaamassavat – taakku atoqqinneqarsinnaammata.
Januaarip ulluisa 10-ta kingorna orpiit katersorneqassapput seqqutserneqarlutillu ikuallaavimmut ikineqarsinnaanngorlugit imaluunniit illoqarfimmi arlaanni immiutitut atorneqarsinnaasunngortinneqassapput. Soorunami orpinnut inissiiffissatut innersuussaq allanik ilitsivigeqqusaanngilaq – igitassat allat Eqqagassaleriffimmut tunniuteqquneqarput.
Atueqqiisinnaaneq eqqarsaatigiuk allallu illit atoqqinngisassanik nuannaaruteqartillugit
Juulli tunisiffiuvoq – nutaarpassuillu nuannersut atulerpata nutaanngitsut nutaanut inissaqartitsisussanngussapput. Taakkuli immaqa suli atorsinnaagaluarput, immaqalu arlannguata taakkorpiannguit iginniakkatit amigaatigivai?
Maani eqqagassaleriffimmiittugut kikkut tamaasa kaammattorumavagut atueqqiisinnaaneq aamma juullikkunni eqqarsaatigeqqullugugu atoqqinneqarsinnaasorpassuimmi angerlarsimaffinni allani atoqqinneqarsinnaanerinut periarfissarpassuaqarput.
Assersuutigalugu misiliguk facebookimi quppernerpassuit KØB-SALG-BYTTE aqqutigalugit allagarsiineq – ajornanngitsunnguuvoq, avatangiiseq inuillu allat taamaalillutit iluaqusissavatit – immaqalu niuerluarnikkut iluanaaruteqalaarsinnaallutit.